Xəbərlər

Bakı, 17 sentyabr (ERtv). Azərbaycan prezidenti İlham Əliyevin bu gün Parisdə “Total” şirkətinin baş icraçı katibi Kristof de Marjeri ilə görüşü olub. Görüşdə Azərbaycanla “Total” şirkəti arasında “Abşeron” və “Şahdəniz” yataqlarının işlənilməsində, boru kəmərləri layihələrinin həyata keçirilməsində əməkdaşlıq, eləcə də əlaqələrin inkişaf perspektivləri ilə bağlı məsələlər müzakirə edilib.

Bakı, 17 sentyabr (ERtv). Azərbaycan prezidenti İlham Əliyevin bu gün Parisdə “Tecnip” şirkətinin quruda və dənizdə baş əməliyyat direktoru, icraçı vitse-prezidenti Filipp Barrillə görüşü keçirilib. Görüşdə “Tecnip” şirkətinin Azərbaycanın neft-qaz sektorundakı uğurlu fəaliyyəti, bu şirkətin “Şahdəniz-1” yatağının işlənilməsində və digər layihələrin həyata keçirilməsində rolu qeyd olunub. Həmçinin gələcəkdə Azərbaycan ilə “Tecnip” arasında əməkdaşlığın digər istiqamətləri və yeni layihələrlə bağlı fikir mübadiləsi aparılıb.

Bakı, 17 sentyabr (ERtv). Bu gün Azərbaycan prezidenti İlham Əliyevin Parisdə “GDF-Suez” şirkətinin sədri və baş icraçı direktoru Jerar Mestrale ilə görüşü keçirilib. Görüşdə Azərbaycanla “GDF-Suez” şirkəti arasındakı əlaqələrin perspektivləri, “Abşeron” qaz yatağı üzrə əməkdaşlıq, həmçinin Azərbaycanda əhalinin dünya standartlarına uyğun təmiz içməli su ilə təmin olunması məsələləri ətrafında fikir mübadiləsi aparılıb.

Bakı, 17 sentyabr (ERtv). Səid Rüstəmov adına əməkdar Xalq Çalğı Alətləri Orkestrinin 80 illik yubileyi ərəfəsində orkestr haqqında Kitab işıq üzü görüb. Bu barədə ERtv-yə açıqlama verən tanınmış vokalçı, AzTV-nin Musiqi kollektivlərinin bədii rəhbəri Ramil  Qasımov bildirib ki, o, uşaqlıq  illərindən bu orkestrlə əməkdaşlıq edib: "İlk dəfə bu orkestrə məni ustadım Mobil Əhmədov gətirmişdi. Daim bizim görkəmli bəstəkarlardan Süleyman Ələsgərovu, Hacı Xanməmmədovu, Şəfiqə Axundovanı, dirijor Nəriman Əzimovu bu orkestrlə iş birliyini görürdüm. O  vaxt heç düşünməzdim ki, bir zaman gələcək və mənə bu orkestr haqqında kitab yazmaq nəsib olacaq. Bu gün Azərbaycan Televiziya və Radiosunda çalışdığım üçün qürur duyuram. Çünki, Televiziya və Radionun Musiqi kollektivləri bizim əbədiyaşarların ilk sənət ocağı olub. Qüdrətli, güclü, günü-gündən inkşaf edən Azərbaycanımızın mədəniyyətinə xidmət etmək mənə böyük şərəfdir".

Qeyd edək ki, üç dildə (Azərbaycan, rus, ingilis) yazılan bu kitabda Şərqdə ilk notlu Xalq Çalğı Alətləri Orkestrinin dünəni və bu günü əks olunub, dövlətin mədəniyyətində xidmətlərindən söhbət açılıb. Həmçinin kitabda CD albomda işıq üzü görüb. CD topluda orkestrlə daim çalışan Bülbül, Rəşid Behbudov, Şövkət Ələkbərova, Gülağa Məmmədov, Lütfiyar İmanov, Mobil Əhmədovun, həmçinin Müslüm Maqamayevin “Radio  Marşı”, Üzeyr bəyin orkestr  üçün “Fantaziya” əsəri öz əksini tapıb.

Bakı, 17 sentyabr (ERtv). Azərbaycan peşəkar musiqisinin banisi dahi Üzeyir Hacıbəylinin 127 illiyi ilə əlaqədar Azərbaycanın tanınmış vokalçısı, Azərbaycan Televiziya və Radiosunun musiqi kollektivlərinin bədii rəhbəri Ramil Qasımovun Üzeyir Hacıbəylinin vokal əsərlərindən ibarət musiqi albomu işıq üzü görüb. CD topluda Üzeyir bəyin “O olmasın, bu olsun”, “Arşın mal alan”, “Koroğlu” operasından ariya və duetlər, bəstəkarın romansları, həmçinin, hərbi vətənpərvərlik mövzusunda yazdığı əsərlər əksini tapıb. Ramil Qasımov bildirib ki, belə bir toplunun ərsəyə gəlməsi onun çoxdankı arzusu olub: "Üzeyir bəyin əsərlərindən ibarət böyük bir toplu çıxarmaq mənim çöxdankı arzum idi. Qüdrətli Azərbaycanımız günü-gündən inkişaf edir. Hər bir insan dövlətinə və cəmiyyətinə faydalı olmağa çalışmalıdır. O cümlədən də mən. Azərbaycan peşəkar musiqisinin banisi dahi Üzeyir bəyin əsərlərinin ilk gənc iştirakçısı və ifaçısı kimi mən deyə bilərəm ki, böyük qürur hissi keçirirəm. 15 yaşımda “O olmasın, bu olsun”da Sərvər, “Arşın mal alan”da Əsgər, həmçinin 26 yaşında “Koroğlu”da Koroğlu obrazını ifa etmək mənə nəsib olub. Üzeyir bəyin əsərlərinin CD albomunu çıxarmaqda məqsəd Azərbaycanın hüdudlarından kənarda olarkən peşəkar musiqimizi təbliğ və təqdim etməkdir". 

Bakı, 17 sentyabr (ERtv). İndoneziyanın İqtisadi məsələlər üzrə koordinasiya naziri Hatta Racasanın rəhbərlik etdiyi rəsmi şəxslərdən və iş adamlarından ibarət geniş tərkibdə nümayəndə heyəti Azərbaycanda səfərdədir. Bu gün İndoneziyanın İqtisadi məsələlər üzrə koordinasiya naziri Hatta Racasanın rəhbərlik etdiyi nümayəndə heyəti Fəxri Xiyabanda ulu öndər Heydər Əliyevin məzarını ziyarət edib, xatirəsini ehtiramla anaraq abidəsi önünə əklil qoyub. İndoneziya nümayəndə heyəti həmçinin, Şəhidlər Xiyabanında Azərbaycanın müstəqilliyi və ərazi bütövlüyü uğrunda canlarından keçən qəhrəmanlarımızın xatirəsini ehtiramla yad edib.

Sonra İndoneziyanın İqtisadi məsələlər üzrə koordinasiya naziri Hatta Racasanın rəhbərlik etdiyi nümayəndə heyəti İqtisadi İnkişaf naziri Şahin Mustafayevlə görüşüb. Görüşdə Şahin Mustafayev Azərbaycan prezidentinin həyata keçirdiyi sosial-iqtisadi siyasət nəticəsində ölkəmizdə möhkəm siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu, əlverişli biznes və investisiya mühitinin yaradıldığını, Azərbaycanın dünyada etibarlı tərəfdaş kimi tanındığını vurğulayıb. Nazir qarşılıqlı rəsmi və işgüzar səfərlərin, təşkil edilən biznes forum və işgüzar görüşlərin ölkələr arasında iqtisadi əlaqələrin genişlənməsində əhəmiyyətli olduğunu vurğulayıb. Azərbaycan və İndoneziya arasında iqtisadi əməkdaşlığın inkişafı, ticarət əlaqələrinin genişləndirilməsi, qarşılıqlı investisiya qoyuluşu məsələləri müzakirə edilən görüşdə işgüzar əlaqələrin genişlənməsi üçün potensial imkanlardan səmərəli istifadənin əhəmiyyəti diqqətə çatdırılıb.

İndoneziyanın İqtisadi məsələlər üzrə koordinasiya naziri Hatta Racasa Azərbaycana səfərindən və ölkəmizin dinamik iqtisadi inkişafından məmnunluğunu ifadə edib, ikitərəfli əlaqələrin inkişafında ölkələrimizin böyük perspektivə malik olduğunu vurğulayıb.

Sonra Bakı Biznes Mərkəzində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun təşkilatçılığı ilə Azərbaycan-İndoneziya biznes forumu keçirilib. Tədbirdə Azərbaycan və İndoneziya tərəfindən nəqliyyat, dağ mədən sənayesi, turizm, daşınmaz əmlak, heyvandarlıq, bitkiçilik, balıqçılıq və s. sahələrdə fəaliyyət göstərən 50-dən çox iş adamı iştirak edib. Biznes forumda İş adamları arasında əməkdaşlığın genişləndirilməsi imkanları müzakirə edilən tədbirdə Azərbaycanın biznes mühiti və investisiya potensialına dair təqdimat keçirilib, ölkəmiz haqqında video çarx nümayiş olunub. Biznes forumda həmçinin, İndoneziya şirkətlərinin təqdimatları keçirilib, onların fəaliyyət sahələri barədə məlumat verilib. Biznes forum zamanı Azərbaycan Sahibkarlar (İşəgötürənlər) Təşkilatları Milli Konfederasiyası ilə İndoneziyanın Ticarət və Sənaye Palatası arasında, AZPROMO ilə İndoneziyanın Ticarət və Sənaye Palatası arasında, eləcə də Azərbaycanın “Gənc sahibkarlar şəbəkəsi” ilə “İndoneziyanın Gənc Sahibkarları Assosiasiyası” arasında əməkdaşlıq haqqında anlaşma memorandumları imzalanıb.

İndoneziyanın İqtisadi məsələlər üzrə koordinasiya naziri Hatta Racasanın rəhbərlik etdiyi nümayəndə heyəti ilə Sənaye və Energetika Nazirliyində, Azərbycan Dövlət Neft Şirkətində, Əmlak Məsələləri Dövlət Komitəsində və Dövlət Neft Fondunda  görüşlər keçirilib. İndoneziya nümayəndə heyəti səfər çərçivəsində Dövlət Bayrağı Meydanı və “İçəri şəhər”lə də tanış olacaq.

Bakı, 17 sentyabr (ERtv). Prezident İlham Əliyev Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “ASAN xidmət” mərkəzlərinin yaradılması məqsədilə pilot layihənin həyata keçirilməsi ilə bağlı tədbirlər haqqında sərəncam imzalayıb. Sərəncama əsasən Azərbaycanın 2012-ci il dövlət büdcəsində nəzərdə tutulan Azərbaycan Prezidentinin ehtiyat fondundan Vətəndaşlara Xidmət və Sosial İnnovasiyalar üzrə Dövlət Agentliyinə “ASAN xidmət” mərkəzlərinin yaradılması ilə bağlı pilot layihənin həyata keçirilməsi məqsədi ilə ilkin olaraq 2,0 (iki) milyon manat ayrılır.

Azərbaycanın Maliyyə Nazirliyi sərəncamda nəzərdə tutulan məbləğdə maliyyələşməni müəyyən olunan qaydada təmin etməli, Nazirlər Kabineti bu sərəncamdan irəli gələn digər məsələləri həll etməlidir.

Bakı, 17 sentyabr (ERtv). Prezident İlham Əliyev İosif Kobzonun “Dostluq” ordeni ilə təltif edilməsi haqqında sərəncam imzalayıb. sərəncama əsasən Rusiya ilə Azərbaycan arasında musiqi mədəniyyəti sahəsində əməkdaşlığın genişləndirilməsində səmərəli fəaliyyətinə görə İosif Davıdoviç Kobzon “Dostluq” ordeni ilə təltif edilib.

Bakı, 17 sentyabr (ERtv). Azərbaycanın müdafiə naziri general-polkovnik Səfər Əbiyev bu gün Litva Respublikasına rəsmi səfər edib. Litvada Azərbaycanın müdafiə nazirinin rəsmi qarşılanma mərasimi keçirilib, hər iki ölkənin dövlət himni səslənib. Azərbaycanın müdafiə naziri Səfər Əbiyevlə Litvanın mili müdafiə naziri Rasa Yunkiaviçene arasında təkbətək, sonra isə geniştərkibli görüş keçirilib. Müdafiə Nazirliyinin mətbuat xidmətindən ERtv-yə verilən məlumata görə, görüşlərdə ölkələrarası hərbi əməkdaşlıq əlaqələrinin daha da gücləndirilməsi qərara alınıb və Litva ilə Azərbaycan müdafiə nazirlikləri arasında yenilənən hərbi əməkdaşlıq haqqında saziş imzalanıb.

Görüşdə Azərbaycanın Litvadakı səfiri Həsən Məmmədzadə də iştirak edib.

Azərbaycanın müdafiə nazirinin sabah Litvanın rəsmi şəxsləri ilə görüşü nəzərdə tutulub.

Bakı, 17 sentyabr (ERtv). Bu gün Azərbaycan prezidenti İlham Əliyev Fransaya işgüzar səfəri baçlayıb. Parisin Orli beynəlxalq hava limanında Azərbaycan prezidentinin şərəfinə fəxri qarovul dəstəsi düzülüb. Azərbaycanın birinci xanımı Mehriban Əliyevaya gül dəstəsi təqdim olunub. Prezident İlham Əliyev hava limanından onun üçün ayrılan iqamətgaha yola düşüb.

Bakı, 17 sentyabr (ERtv). Sentyabrın 18-dən etibarən Bakı şəhərində Qırğız Respublikasının Gənclər, Əmək və Məşğulluq Nazirliyinin əməkdaşları və Qeyri Hökumət Təşkilatlarının nümayəndələri üçün təlim kursuna start veriləcək.

Təlim kursunun Proqramına əsasən iştirakçılara Azərbaycanda gənclər siyasəti sahəsində gürülən işlər haqqında ətraflı məlumatların verilməsi, Gənclər Fondunda, Azərbaycan Tələbə Gənclər Təşkilatları İttifaqında görüşlərin keçirilməsi və Bakı şəhərində gəzintilərin təşkili nəzərdə tutulub. 

Bakı, 17 sentyabr (ERtv). Cənubi Koreyanın paytaxtı Seul şəhərinin Olimpik stadionunda “World Peace Initiative” adlı festivalı keçirilib. Festivalda ölkəmizi Dünya Azərbaycanlı Gənclər Birliyinin Koreya nümayəndəsi KAIST Universitetinin tələbəsi Cavid Əliyev təmsil edib.

ABŞ, Avropa, Afrika, Asiya ölkələrinin bir çox aparıcı telekanalları bu festivalı işıqlandırıb. Festivalın açılış mərasimi 150-dən çox ölkənin iştirak etdiyi təntənəli keçidlə başlayıb.

Festivala qatılan və müxtəlif millətləri, mədəniyyətləri və dinləri təmsil edən 100.000 iştirakçı “Dünyaya Sülh”  ismarıcı verib. Festivalda yeni Ginnes rekordu qeydə alınıb. Eyni anda 100.000 çıraq işıqlandırılıb.

Bakı, 17 sentyabr (ERtv). Bu gün Azərbaycan prezidenti İlham Əliyev Fransaya işgüzar səfərə yola düşüb. Dövlət başçısını Heydər Əliyev Beynəlxalq Aeroportunda Baş nazir Artur Rasizadə, Prezident Administrasiyasının rəhbəri Ramiz Mehdiyev və Bakı Şəhər İcra Hakimiyyətinin başçısı Hacıbala Abutalıbov yola salıb.

Bakı, 17 sentyabr (ERtv). Sentyabrın 20-də Milli İnternet Mükafatına - Milli Net 2012-yə start verilir. Milli Net müsabiqəsinin keçirilməsindən məqsəd ölkədə İKT sektorunun, xüsusilə də İnternetin  inkişafına kömək etmək, ən yaxşı milli internet resurslarımızın təbliğini aparmaq və Azərbaycan dilinin İnternetdə tətbiqini genişləndirməkdən ibarətdir.

Bu il keçirilməsi nəzərdə tutulan Milli Net 2012 Qaydalarında müəyyən dəyişikliklər edilib. Ötən ildən fərqli olaraq 2 yeni Nominasiya əlavə olunub və Nominasiyaların sayı artırılaraq 13-ə çatdırılıb. Aşağıdakı Nominasiyalar üzrə yarışmanın keçirilməsi nəzərdə tutulub.

1. Korporativ saytlar
2. İctimai-sosial saytlar
3. Media və İnformasiya
4. Mədəniyyət, incəsənət və turizm saytları
5. Ailə, uşaq və sağlamlıq
6. Asudə vaxt, idman və əyləncə
7. Bloqlar
8. Elm və təhsil
9. Dövlət və bələdiyyə saytları
10. Xidmət (Servis)
11. İstifadəçi kontenti üzərində qurulmuş saytlar
12. Ən yaxşı sosial şəbəkə
13. StartUp 2012

“Ən yaxşı sosial şəbəkə” Nominasiyasına istifadəçilərlə informasiya münasibətlərini və xidmətlər göstərilməsini fəal formada Facebook səhifəsi üzərindən həyata keçirən qurumlar öz Facebook səhifələrini təqdim edə bilərlər. Bu Nominasiyanın qaliblərinə  SAZZ şirkətinin xüsusi mükafatları təqdim olunacaq.

Azərbaycan İnternetində yeni saytların yaranmasını stimullaşdırmaq üçün StartUp 2012 Nominasiyası əlavə olunub. Bu Nominasiya üzrə yalnız 2012-ci ilə fəaliyyətə başlayan İnternet Layihələr və saytlar yarışmaya qəbul ediləcək.

Ötən ildə olduğu kimi Qiymətləndirmə prosesini internet istifadəçiləri deyil, peşəkarlardan və mütəxəssislərdən ibarət olmaqla AİF tərəfindən formalaşdırılan Münsiflər Heyəti aparacaq. Münsiflərə hər hansı aidiyyəti olan saytların Müsabiqədə iştirakına yol verilmir . Münsiflər Heyətinin verdiyi səslər Müsabiqə başa çatdıqdan sonra ictimaiyyət üçün açıqlanır və www.millinet.az  saytında yerləşdirilir.

Münsiflər Heyətinin tərkibi yeniləşdirilib. Münsiflərin hər bir sayt üzrə verdikləri qiymətlərin əsaslandırması  zəruridir.  Ötən illərdə olduğu kimi bu il də Müsabiqədə yalnız Azərbaycan dili versiyası olan saytların iştirakına icazə veriləcək.

Qeydiyyat prosesi  20 Sentyabr tarixdən başlayır və noyabrın sonunda başa çatır. Səsvermə prosesi dekabrın 15-dək davam edəcək. Cari ilin sonunda müsabiqənin yekunlaşdırılması və qaliblərin mükafatlandırılması məqsədilə təqdimat mərasiminin keçirilməsi nəzərdə tutulub.

Müsabiqədə 13 Nominasiyanın hər biri üzrə qalib gələnlərə Milli Net–in tuncdan hazırlanmış xüsusi mükafatı – hörümçək əks olunan buta təqdim olunacaq.

Bakı, 17 sentyabr (ERtv). «Regional İnsan Hüquqları və Media Mərkəzi» İctimai Birliyi müharibədən zərərçəkən ailələrdən olan uşaqlar üçün ödənişsiz dərzilik kurslarını davam etdirir. Azərbaycanın Prezidenti yanında Qeyri-Hökumət Təşkilatlarına Dövlət Dəstəyi Şurası və Türk İşbirliyi və Kalkınma İdarəsi Başkanlığının (TİKA) Bakı Proqram Koordinatorluğunun dəstəyi ilə həyata keçirilən layihə çərçivəsində ilk 4 qrupda dərslər yekunlaşıb. Kursları müvəffəqiyyətlə bitirənlərə nəfərə sertifikatlar təqdim edilib. Artıq sonuncu iki qrupda da dərslər yekunlaşmaq üzrədir. Bu dəfə də dərslər hər birində 10 nəfər olmaqla iki qrupda aparılır. Kurslar həftədə 3 dəfə keçirilir. Kurslara Bərdə, Ağdam və Tərtər rayonlarında məskunlaşan qaçqın, məcburi köçkün, həmçinin həmin rayonlarda yaşayan şəhid ailələri, əsir və itkin düşmüş, girov götürülmüş şəxslərin ailələrindən olan şəxslər cəlb olunub. Bu layihə çərçivəsində ümumilikdə 60 nəfər kurslara cəlb edilib.

Qeyd edək ki, «Qarabağ müharibəsindən zərərçəkən ailələrdən olan şəxslər üçün dərziliklə bağlı kursların təşkili» layihəsinin 6 ay müddətində icra edilməsi nəzərdə tutulub. Layihədə əsas məqsəd bu təbəqədən olan gənclərə peşə bacarıqlarının öyrədilməsi ilə onların məşğulluğunun artırılmasına nail olmaqdır. Bu həm də həmin təbəqədən olan şəxslər arasında əmək miqrasiyasının azaldılmasına və onların sosial vəziyyətinin yaxşılaşdırılmasına yardım edəcək. 

Bakı, 17 sentyabr (ERtv). Vyanada Platts və Avstriyanın Enerji Nazirliyi tərəfində təşkil olunan 6-ci illik “Avropa qaz təchizatı və infrastruktur” adlı beynəlxalq konfrans keçirilib. Konfransda enerji sahəsində tanınmış ekspertlər, qaz şirkətlərinin rəhbərləri, Avropa enerji infrastrukturunun nümayəndələri, boru kəmər operatorları və s. iştirak edib. Tədbirdə əsasən Avropa bazarının qazla təchizat, təchizat və tələb təhlükəsizliyi məsələləri, həmçinin Cənub Qaz Dəhlizinə daxil olan layihələrin son inkişaf durumu müzakirə olunub.

Azərbaycanı tədbirdə Strateji Araşdırmalar Mərkəzinin aparıcı elmi işçisi Gülmira Rzayeva təmsil edib. Ekspert öz çıxışında Cənub Dəhlizin inkişafı haqda danışaraq son hadisələri təhlil edib. O, bildirib ki, Türkiyənin Türkmənistan qazının İran vasitəsilə öz daxili bazarına və həmçinin Avropa bazarlarına nəql etmək niyyəti Azərbaycanın bu layihədə maraqlarına təsir göstərəcək. G.Rzayeva qeyd edib ki, məhz bu səbəbdən Transxəzər boru xətti məsələsi tezliklə həll olunmalıdır. 

Cənub Dəhlizin Avropaya nəql edəcək marşrutun seçilməsi qərarı tezliklə baş verməzsə İraq, Qatar, Şimali Afrika və yaxud Şərqi Aralıq Dəniz qazı rəqabət təşkil edə və Şah Dəniz qazı hədəfə aldığı Avropa bazarlarını tuta bilər.

Bakı, 17 sentyabr (ERtv). Erməni silahlı bölmələri bu gecə Ermənistanın İcevan rayonunun Berkaber, Noyemberyan rayonunun Voskevan kəndlərində və Ağdamın işğal olunan Şıxlar kəndi yaxınlığında yerləşən mövqelərdən atəşkəs rejimini pozub. Müdafiə Nazirliyinin mətbuat xidmətindən ERtv-yə verilən məlumata gör, qarşı tərəf cavab atəşi ilə susdurulub.

Bakı, 15 sentyabr (ERtv). Prezident İlham Əliyev 2012/2013-cü tədris ilində Azərbaycanın ali məktəblərinə daxil olan tələbələrə prezident təqaüdünün verilməsi haqqında sərəncam imzalayıb. Sərəncama əsasən 2012/2013-cü tədris ilində tələbə qəbulu imtahanlarında ixtisas qrupları üzrə ən yüksək nəticələr göstərən və Azərbaycanın ali məktəblərinə daxil olan aşağıdakı tələbələrə Prezident təqaüdü veriləcək:

Abbasova Fidan Sahib qızı

Abbasova Səbinə Elbəy qızı

Abdullah Simuzər Əli qızı

Abdullayev Coşqun Tahir oğlu

Ağazadə Vüsal Adil oğlu

Axundov Ayxan Asim oğlu

Axundov Bəhram Murad oğlu

Allahverdiyev Bəxtiyar Baba oğlu

Allahverdiyeva Surə Şəmsəddin qızı

Ataxanlı Elgün Zahid oğlu

Bağırlı Nigar İlqar qızı

Baxşəliyeva Reyhanə Ələkbər qızı

Bəşirli Leyla Elşad qızı

Bəylərova Zərrintac Elxan qızı

Cəfərli Əlibəy Azər oğlu

Dünyamalıyeva Nurlana Yasif qızı

Əbilova Nərmin Adil qızı

Əhmədli Əli Fuad oğlu

Əhmədov Elvin Aydın oğlu

Əhmədov Sadiq Təhmasib oğlu

Əliyev Cahangir Saleh oğlu

Əlili Əliqulu Mahmud oğlu

Əliyeva Eldanə Hüseyn qızı

Əliyeva Xeyransa Rafiq qızı

Əliyeva Kəmalə Kamal qızı

Əliyeva Sevinc Oruc qızı

Əliyeva Səlmi Mehman qızı

Əliyeva Ülviyyə Mübariz qızı

Əlizadə Zümrüd Mürşüd qızı

Əmirova Nərmin Elşad qızı

Əmişova Gülnarə Fərahim qızı

Gəraylı Lalə Elxan qızı

Haqverdiyeva Gülşən Xudaverdi qızı

Heydərli Elxan Cəbrayıl oğlu

Həsənova Ləman Habil qızı

Həsrətli Xanım Həzrət qızı

Hətəmova Tərgül Arzuman qızı

Hüseynov Şaiq İbrahim oğlu

Hüseynova Elnurə Rəfael qızı

Hüseynova Ruhəngiz Telman qızı

Hüseynzadə Ülvi Atababa oğlu

Hüsüzadə Fəhmin Əkbər oğlu

Xanlarzadə Xanlar Mehti oğlu

İbrahimli Nərmin Sabir qızı

İbrahimov Nicat İlrəvan oğlu

İsazadə Nurlan Namik oğlu

İsmayılov Rəşad Fəhrat oğlu

İsmayılzadə Tural Cavid oğlu

Kərimli Nəriman Akif oğlu

Kərimli Pərviz Elşad oğlu

Kərimov Elnur Telman oğlu

Knyazlı Nəriman Aydın oğlu

Qasımzadə İlhamə Sultan qızı

Qasımzadə Rövşanə Elşən qızı

Qədirli Bəhruz Adil oğlu

Qurbanov Böyükağa Həsənağa oğlu

Qurbanov Mais Rövşən oğlu

Mahmudova Günay Mustafa qızı

Mehdili Nihad Zöhrab oğlu

Mehdiyeva Dilbər İlqar qızı

Mehdiyeva Könül Fikrət qızı

Məmişov Rəşid Əlbala oğlu

Məmmədli Aytən Əhməd qızı

Məmmədli Emil Oqtay oğlu

Məmmədli Nigar Zakir qızı

Məmmədov Emin İlqar oğlu

Məmmədov Fərid Saleh oğlu

Məmmədov Həsənağa Vüqar oğlu

Məmmədov Samir Vahid oğlu

Məmmədov Turhan Zakir oğlu

Məmmədova Xatın Fərhad qızı

Məmmədova Lalə Emin qızı

Mirzəyev Tamerlan İftixar oğlu

Möhsümova Aytən İlham qızı

Muradov Kamran Fuad oğlu

Mütədayın Bahar İbrahim qızı

Nağızadə Kənanə Məhərrəm qızı

Nərgiz Məzahir qızı

Nəsibov Yaşar Mansur oğlu

Nizamov İlham İlqar oğlu

Novruzlu Nuranə Qərib qızı

Nuri Taleh Tacəddin oğlu

Orucov Qurban İbrahim oğlu

Oruczadə Kamil Şamil oğlu

Paşabəyli Əşrəf Saleh oğlu

Rəhimov Rza Rasim oğlu

Rəsulzadə Fəxriyyə Yaqub qızı

Rəşidov Anar Mərdan oğlu

Sadıqov Eltun Arif oğlu

Sarayev Qalib Yaşar oğlu

Səfərov Orxan Arif oğlu

Səlimova Pərnaz Adil qızı

Soltanova Aidə Ramiz qızı

Sultanlı Türkan İsgəndər qızı

Süleymanov Kərim Fazil oğlu

Süleymanova Vəfa Əmiraslan qızı

Şirəliyeva Nailə Heybət qızı

Tərlanlı Ümid Elman oğlu

Vəliyev Aydın Kərəm oğlu

Yusibzadə Elmar Elçin oğlu

Yusifli Səxavət Nizami oğlu

Zinharlı Eşqin Adil oğlu

Nazirlər Kabineti sərəncamdan irəli gələn məsələləri həll etməlidir.

Bakı, 15 sentyabr (ERtv). Azərbaycan Milli Məclisinin sədri Oqtay Əsədovun başçılığı ilə parlament nümayəndə heyəti sentyabrın 16-dan 19-dək Albaniyanın paytaxtı Tirana şəhərində rəsmi səfərdə olacaq. Milli Məclisin mətbuat xidmətindən ERtv-yə verilən məlumata görə, nümayəndə heyətinin tərkibinə deputatlardan Mirkazım Kazımov, Çingiz Əsədullayev, Milli Məclis Aparatının rəhbəri Səfa Mirzəyev və digər rəsmi şəxslər daxildir.

Səfər çərçivəsində nümayəndə heyətinin üzvləri Albaniya parlamentində olacaq, ölkənin qanunverici orqanının fəaliyyəti ilə yaxından maraqlanacaq, albaniyalı həmkarları ilə parlamentlərarası əlaqələrin bu günü və gələcək inkişaf perspektivləri barədə fikir mübadiləsi aparacaq.

Səfər zamanı Milli Məclisin sədri Oqtay Əsədovun Albaniyanın prezidenti Buyar Nişani, parlamentin sədri Jozefina Topalli, baş nazir Sali Berişa və digər rəsmi şəxslərlə bir sıra görüşləri də nəzərdə tutulub. Görüşlərdə ikitərəfli əlaqələrin daha da dərinləşdirilməsi və tərəfləri maraqlandıran digər məsələlər ətrafında danışıqlar aparılacaq.

Bakı, 15 sentyabr (ERtv). Azərbaycanın Cənubi Afrika Respublikasındakı Səfirliyi fəaliyyət göstərdiyi ölkənin Pretoriya şəhərində CAR-ın Beynəlxalq Əlaqələr və Əməkdaşlıq  Departamentinin təşkil etdiyi “Diplomatik Yarmarka”da iştirak edir. Hər il təşkil ediən ənənəvi yarmarkada CAR-da fəaliyyət göstərən diplomatik korpusun nümayəndələrinə öz ölkələrinin tarixi və mədəniyyətini təqdim etmək şəraiti yaradılır. Səfirliyimiz isə öz növbəsində Azərbaycan üçün ayrılan hissədə ölkəmizin tarixini və müasir dövrünü əks etdirən fotoşəkillər, xalçalar, kitablar, milli şirniyyatlar və mədəniyyətimizi əks etdirən digər əşyaları nümayiş etdirib.

Yarmarkanı açıq elan edən CAR BƏƏD-nin nazir müavini İbrahim İbrahim daha sonra sərgidə iştirak edən ölkələrin səfirləri ilə birgə yarmarkanı gəzərək ölkələrin sərgiləri ilə tanış olub.

Qeyd edək ki, Azərbaycanın Səfirliyi CAR üçün ənənəvi sayılan yarmarkada ilk dəfədir iştirak edir. Tədbiri iki gün ərzində minlərlə xarici və yerli vətəndaşlar ziyarət edib.