Xəbərlər

Tələbə Qəbulu üzrə Dövlət Komissiyası ali məktəblərinə keçirilmiş qəbul imtahanlarının nəticələrinə əsasən müsabiqə şərtlərini ödəyən və ixtisas seçiminə buraxılan abituriyentlərə xəbərdarlıq edib.

Komissiyadan çərşənbə günü verilən məlumata görə, 2012-2013-cü tədris ili üçün Azərbaycanın ali məktəblərinə keçirilmiş qəbul imtahanlarının nəticələrinə əsasən müsabiqə şərtlərini ödəyən abituriyentlərin ixtisas seçimi avqustun 7-dən 16-dək internet vasitəsilə aparılır.

İxtisas seçimi sabah saat 23:59-da başa çatacaq. Həmin vaxtadək ixtisas seçiminə buraxılmış bütün abituriyentlər ixtisas seçimi etməli və mütləq "Abituriyentin elektron ixtisas seçimi ərizəsi"ni təsdiqləməlidirlər. Ərizələrini təsdiqləməyən abituriyentlər müsabiqədə iştirak etmək hüququnu itirirlər.

İxtisas seçimi mərhələsində abituriyentlər qəbul olmaq istədikləri ixtisasları seçib onların kodlarını "Abituriyentin elektron ixtisas seçimi ərizəsi"nə daxil edirlər. Avqustun 15-i saat 10:00-dək həmin abituriyentlərdən 34081 nəfəri ixtisas seçimi ərizəsini təsdiq edib.

Avqustun 14-15-də Səudiyyə Ərəbistanı Krallığında İslam Zirvə Toplantısının Dördüncü Fövqəladə Sessiyası keçiriləcək.

Xarici İşlər Nazirliyinin mətbuat xidmətindən verilən məlumata görə, Azərbaycan prezidenti İlham Əliyev Səudiyyə Ərəbistanı Kralı Abdulla bin Əbduləziz əl Səud tərəfindən sözügedən Zirvə Toplantısına dəvət edilib.

Zirvə Toplantısında Azərbaycan xarici işlər naziri səviyyəsində təmsil olunacaq. Bu məqsədlə xarici işlər naziri Elmar Məmmədyarov avqustun 14-15-də Səudiyyə Ərəbistanı Krallığının Məkkə şəhərinə səfər edəcək.

Ekologiya və Təbii Sərvətlər Nazirliyi Milli Hidrometeorologiya Departamentindən çərşənbə axşamı bildiriblər ki, Bakıda və Abşeron yarımadasında avqustun 15-də hava şəraitinin əsasən günəşli keçəcəyi gözlənilir. Şimal küləyi gündüz cənub küləyi ilə əvəz olunacaq.

Havanın temperaturu gecə 23-27, gündüz 36-38, bəzi yerlərdə 40 dərəcə isti təşkil edəcək.

Avqustun 15-16-da Abşeron yarımadasında günəşli hava şəraitinin davam edəcəyi, zəif cənub küləyinin əsəcəyi gözlənilir.

Abşeronun çimərliklərində dəniz suyunun temperaturu Sumqayıt, Novxanı, Pirşağı, Nardaran, Bilgəh, Zuğulbada 26-27, Buzovna, Mərdəkan, Şüvəlanda 27-28, Türkan, Hövsan, Şıx, Sahildə 29-30 dərəcə isti olacaq.

Azərbaycanın rayonlarında avqustun 14-də hava şəraitinin əsasən yağmursuz keçəcəyi gözlənilir. Şərq küləyi əsəcək.

Havanın temperaturu gecə 21-26, gündüz 36-39, bəzi yerlərdə 42, dağlarda gecə 14-18, gündüz 29-34 dərəcə isti olacaq.

Bir neçə gündən sonra müsəlman aləmi üçün müqəddəs Ramazan bayramının qeyd ediləcəyini deyən Prezident İlham Əliyev bildirdi ki, bayram ərəfəsində müsəlman ölkələrinin Azərbaycandakı səfirləri və diplomatik nümayəndəliklərinin rəhbərləri ilə görüş artıq ənənəyə çevrilmişdir. İldən-ilə Azərbaycanda müsəlman ölkələrinin səfirliklərinin sayının artdığını diqqətə çatdıran dövlətimizin başçısı qeyd etdi ki, müsəlman ölkələri ilə sıx əməkdaşlığımız vardır. Hazırda bu əlaqələr ikitərəfli formatda bütün sahələri əhatə edir və daha da genişlənir.

Azərbaycanın BMT Təhlükəsizlik Şurasına üzv seçilməsində müsəlman ölkələrinin dəstəyini qeyd edən dövlətimizin başçısı bildirdi ki, Ermənistan-Azərbaycan, Dağlıq Qarabağ münaqişəsinin həlli məsələsində də rəsmi Bakı daim müsəlman ölkələrinin dəstəyini hiss edir.

Azərbaycan Prezidenti dedi ki, dünyada Xocalı soyqırımını rəsmən tanıyan ilk ölkə də məhz müsəlman ölkəsi - Pakistan olmuşdur. Buna görə bu ölkənin rəhbərliyinə minnətdarlığını bildirən Prezident İlham Əliyev dedi ki, ATƏT işğal olunmuş ərazilərə faktaraşdırıcı missiya göndərmiş və onlar da ermənilərin məscidləri və digər müqəddəs abidələri məhv etdiklərinin şahidi olmuşlar.

Dövlətimizin başçısı bildirdi ki, Azərbaycan İslam həmrəyliyinə böyük əhəmiyyət verir və Bakının da İslam mədəniyyətinin paytaxtı elan edilməsi İslam aləminin ölkəmizə verdiyi böyük dəstəkdir. “İslam dəyərləri bizim üçün əzizdir, doğmadır. Bizim milli dəyərlərin təməlində İslam dəyərləri dayanır”, - deyən Prezident İlham Əliyev İslam aləminin həmrəyliyinin əhəmiyyətinə toxundu. Azərbaycan Prezidenti bütün müsəlman ölkələrinə sülh arzuladı, Yaxın Şərqdə gedən proseslərlə bağlı dövlətimizin Ərəb Liqasının mövqeyini dəstəklədiyini vurğuladı. dünyada İslam haqqında yayılan şayiələrə qarşı birgə mübarizə aparmağın önəminə də toxunan Prezident dedi: “İslamı terror ilə bağlamaq cəhdləri böyük günahdır, böyük cinayətdir”.

Sonda dövlətimizin başçısı qarşıdan gələn Ramazan bayramı münasibətilə müsəlman ölkələrinin Azərbaycandakı səfirləri və diplomatik nümayəndəliklərinin rəhbərlərinə öz ölkələrinin dövlət və hökumət başçılarına təbriklərini çatdırmağı xahiş etdi.

Müsəlman ölkələrinin səfirləri və diplomatik nümayəndəliklərinin rəhbərləri adından çıxış edən Türkiyənin Azərbaycandakı fövqəladə və səlahiyyətli səfiri Hulusi Kılıç görüşə görə Prezident İlham Əliyevə minnətdarlığını bildirdi.

Qarşıdan gələn Ramazan bayramı münasibətilə dövlətimizin başçısına təbriklərini çatdıran səfir bu ayın müsəlman dünyası üçün kəsb etdiyi əhəmiyyətdən danışdı.

Hulusi Kılıç dünyada hökm sürən maliyyə böhranı zamanı Azərbaycanın iqtisadi inkişafı, ümummilli lider Heydər Əliyevin siyasi xəttinin bu gün də uğurla davam etdirilməsi, ölkəmizin BMT Təhlükəsizlik Şurasına üzv seçilməsindən də ətraflı danışdı.

“Eurovision” mahnı müsabiqəsinin Bakıda yüksək səviyyədə keçirildiyini deyən səfir Beynəlxalq Muğam festivallarının da böyük maraqla qarşılandığını vurğuladı.

Diplomat Ermənistan-Azərbaycan, Dağlıq Qarabağ münaqişəsi ilə bağlı müsəlman dünyasının nümayiş etdirdiyi dəstəyi də yüksək qiymətləndirdi.

Sonda xatirə şəkli çəkdirildi.

Londonda tarixi qələbəyə imza atan Azərbaycan olimpiyaçılarının vətənə qayıdacaqları tarix müəyyənləşib. 

Milli Olimpiya Komitəsinin nəşriyyat və informasiya idarəsinin rəhbəri Camaləddin Rəhmanovun Apasport.az saytına verdiyi məlumata görə, nümayəndə heyətimiz Böyük Britaniya paytaxtını sabah tərk edəcək.

Komandamızı gətirəcək təyyarə yerli vaxtla saat 22:05-də (Bakı vaxtı ilə saat 02:05) Bakıya üz tutacaq. Hansısa ləngimə olmasa, təyyarə 07:35-də Heydər Əliyev Beynəlxalq Hava Limanına çatacaq.

Qeyd edək ki, Azərbaycan idmançıları London Olimpiadasında 2 qızıl, 2 gümüş və 6 bürünc medal qazanıblar.

Azərbaycan Respublikasının Prezidenti İlham Əliyev avqustun 13-də Koreya Respublikasının ölkəmizdəki fövqəladə və səlahiyyətli səfiri Lee Ci Hanı diplomatik fəaliyyətinin başa çatması ilə əlaqədar qəbul etmişdir.

Azərbaycan Respublikası ilə Koreya Respublikası arasında ikitərəfli münasibətlərin bir çox sahələri əhatə etdiyini vurğulayan dövlətimizin başçısı əlaqələrimizin uğurlu inkişafından məmnunluğunu bildirdi. Koreya Respublikasına son səfərini xatırlayan Prezident İlham Əliyev Koreyada gedən sürətli inkişafın şahidi olduğunu dedi və ölkələrimiz arasında siyasi, iqtisadi, mədəni və digər sahələrdə geniş əməkdaşlıq əlaqələrinin önəmini qeyd etdi.

Azərbaycanda çoxlu sayda Koreya şirkətlərinin fəaliyyətinə toxunan dövlətimizin başçısı ölkəmizdə həyata keçirilən birgə layihələrin əhəmiyyətini vurğuladı və bu əməkdaşlığın gələcəkdə daha da genişləndiriləcəyinə əminliyini ifadə etdi. Prezident İlham Əliyev Azərbaycandakı diplomatik fəaliyyətinə və ölkələrimiz arasında əlaqələrin inkişafına verdiyi töhfəyə görə səfirə təşəkkürünü bildirdi, ona gələcək fəaliyyətində uğurlar arzuladı.

Koreya Respublikasının ölkəmizdəki fövqəladə və səlahiyyətli səfiri Lee Ci Han Azərbaycan idmançılarının XXX London Yay Olimpiya Oyunlarında əldə etdiyi yüksək nəticələrə görə dövlətimizin başçısını təbrik etdi.

Koreyalı diplomat ölkələrimiz arasında əlaqələrin inkişafından məmnunluğunu ifadə etdi. Azərbaycan ilə Koreya arasında əlaqələrin siyasi, iqtisadi, mədəni və humanitar sahələrdə inkişafının razılıq doğurduğunu vurğulayan Lee Ci Han bu əlaqələrin daha da genişlənəcəyinə əminliyini bildirdi.

2012/2013-cü tədris ilində Azərbaycanın ali təhsil müəssisələrinin magistraturalarının boş qalan plan yerlərinə qəbul üçün "Bakalavrın elektron ərizəsi"ndə ixtisaslaşmaların seçilməsi və təsdiqi müddəti yekunlaşıb.

Tələbə Qəbulu üzrə Dövlət Komissiyasının Magistratura üzrə yoxlama-ölçmə materiallarının işlənməsi şöbəsinin müdiri Natiq Əliyev bazar ertəsi bildirib ki, 1373 vakant yer üzrə aparılan müsabiqədə iştirak etmək üçün 667 nəfər bakalavr ərizəsində ixtisas seçimi apararaq təsdiqləyib. Onların 579 nəfəri Azərbaycan, 88 nəfəri rus bölməsi üzrə sənəd verib.

Əliyev bildirib ki, müsabiqənin nəticələrinin bu gün axşam və ya sabah açıqlanağı gözlənilir.

Bakalavrlar boş qalan yerlərə keçirilən müsabiqədə iştirak etmək üçün avqustun 7-dən 13-dək TQDK-nın internet saytının müvafiq səhifəsinə (tqdk.gov.az/erizemagistr) daxil olub, seçdiyi ixtisaslaşmaların kodlarını "Bakalavrın elektron ərizəsi"ndə qeyd edib təsdiqləyiblər.

Azərbaycanın ali təhsil müəssisələrinin magistraturalarının boş qalan yerlərinə qəbul bu il martın 4-də və iyunun 24-də keçirilmiş iki mərhələli qəbul imtahanında toplanılmış ballar əsasında müsabiqə yolu ilə aparılır.

İranın Şərqi Azərbaycan əyalətinin Vərzəqan şəhərində yenidən Rixter cədvəli üzrə 4,7 bal gücündə zəlzələ qeydə alınıb.

Tehran Universitetinin Geofizika İnstitutu yanında Seysmoloji Mərkəz zəlzələnin yerli vaxtla bu gün saat 06:26-də baş verdiyini bildirib.

Zəlzələ nəticəsində dağıntı və xəsarət alanlar barədə məlumat yoxdur.

Qeyd edək ki, avqustun 11-də İranın şımalı-qərbində 6.2 bal gücündə baş vermiş zəlzələ nəticəsində ölənlərin sayı 300-ü, yaralıların sayı isə 2 min nəfəri keçib.

Zəlzələnin episentri olan Əhər, Vərzəqan və Həris şəhərlərində 110 kəndin tamamilə və ya qismən dağıldığı bildirilir.

Olimpiya stadionunun ortasında quraşdırılmış məşhur Biq-Benin simvolik surətinin zəngləri tədbirin başlanması barədə xəbər verdi.

Londonda XXX Yay Olimpiya Oyunlarının bağlanış mərasimi keçirilmişdir.

XXX London Yay Olimpiya Oyunlarının bağlanış mərasimi dünya ölkələri olimpiyaçılarının yürüşü ilə başlanmışdır. Müxtəlif ölkələrin idmançılarının birgə yürüş ənənəsinin təməli 1956-cı ildə qoyulmuşdur. Bu yürüş idmanın birləşdirici qüvvəsinin rəmzidir.

Oyunların bağlanış mərasimində “Britaniya musiqisi simfoniyası” konserti olmuşdur. Konsertdə müasir kompozisiyalar və klassik musiqi əsərləri səslənmişdir. Konsert çərçivəsində ingilis bəstəkarı Edvard Elqarın əsərləri səslənmiş, “Muse” qrupu Adel, Corc Mayklın mahnılarını ifa etmişdir.

“Britaniya musiqisi simfoniyası” konsertində dörd mindən çox musiqiçi iştirak etmişdir.

XXX London Yay Olimpiya Oyunlarının bağlanış mərasimində olimpiya məşəli təntənəli surətdə söndürülmüşdür. Sonra üç ölkənin – Olimpiya oyunlarının vətəni Yunanıstanın, Böyük Britaniyanın və növbəti Yay Olimpiya Oyunlarının keçiriləcəyi Braziliyanın bayraqları qaldırılmışdır.

Xatırladaq ki, London Yay Olimpiya Oyunlarında Azərbaycanı 16 idman növündə 53 idmançı təmsil etmişdir. Olimpiya oyunlarında Azərbaycan idmançıları on medal, o cümlədən iki qızıl, iki gümüş və altı bürünc medal qazaılmışdır.

Bakıda və Abşeron yarımadasında  hava günəşli keçəcək. Temperatur gecə 22-27, gündüz 34-38 dərəcə isti olacaq.

Bakıda gecə 25-27, gündüz 36-38 dərəcə isti olacağı gözlənilir.

Atmosfer təzyiqi normadan aşağı - 754 millimetr civə sütunu təşkil edəcək, nisbi rütubət gecə 65-75 faiz, gündüz 50-55 faiz olacaq.

Abşeron çimərliklərində dəniz suyunun temperaturunun Sumqayıt, Novxanı, Pirşağı, Nardaran, Bilgəhdə, Zuğulbada 25-26, Buzovna, Mərdəkan, Şüvəlanda 26-27, Türkan, Hövsan, Sahil, Şıxda 28-29 dərəcə isti olacağı gözlənilir.

Naxçıvan Muxtar Respublikasında hava əsasən, yağmursuz keçəcək. Temperaturun gecə 20-25, gündüz 35-39, bəzi yerlərdə 41 dərəcə isti olacağı gözlənilir.

Yuxarı Qarabağ: Xankəndi, Şuşa, Xocalı, Xocavənd, Qubadlı, Zəngilan, Laçın, Kəlbəcər, Daşkəsən, Gədəbəy rayonlarında hava əsasən, yağmursuz keçəcəkdir. Temperaturun gecə 13-18, gündüz 29-33 dərəcə isti olacağı gözlənilir.

Qazax-Gəncə, Goranboy, Tərtər-Ağdam-Ağcabədi-Füzuli-Cəbrayıl rayonlarında

hava əsasən, yağmursuz keçəcək. Temperaturun gecə 20-25, gündüz 33-38 dərəcə isti olacağı gözlənilir.

Balakən-Zaqatala-Qax-Şəki-Oğuz-Qəbələ, İsmayıllı-Şamaxı-Ağsu-Xızı, Siyəzən-Şabran, Quba-Qusar-Xaçmaz rayonlarında hava əsasən, yağmursuz keçəcək. Temperaturun gecə 19-24, gündüz 32-37 dərəcə olacağı gözlənilir.

Mərkəzi-Aran: Ağdaş, Mingəçevir, Yevlax, Kürdəmir, İmişli, Beyləqan, Sabirabad, Biləsuvar, Saatlı, Şirvan, Hacıqabul, Salyan, Neftçala rayonlarında hava əsasən, yağmursuz keçəcək. Temperaturun gecə 20-25, gündüz 37-39, bəzi yerlərdə 42 dərəcə olacağı gözlənilir.

Masallı-Lənkəran-Astara-Lerik və Yardımlı rayonlarında hava yağmursuz keçəcək. Temperaturun gecə 22-25, gündüz 34-39, dağlarda gecə 19-21, gündüz 28-32 dərəcə isti olacağı gözlənilir.

Bu gün Azərbaycanın London Olimpiadasındakı sonuncu iki idmançısı, sərbəst güləşçilər Hetaq Qazyumov və Cabrayıl Həsənov mübarizəyə qoşulublar.

Azərbaycanın sərbəst güləş üzrə yığmasının üzvü Xetaq Qazyumov (96 kq) bürünc medal uğrunda yarışda öncə tacikistanlı İsgəndəri ilə qüvvəsini sınayıb. Döyüşün taleyini təcrübə həll edib. İdmançımız 20 yaşlı gənc həmkarını ilk hissədə 3:1, ardınca 3:0 hesabı ilə məğlub edib.

Qazyumov bürünc uğrunda növbəti görüşə çıxmalı olsa da, qarşılaşmaya çıxmadan qalib elan olunub. Təmsilçimizin növbəti rəqibi iranlı Əli Yazdani olmalı idi. Lakin o Andritsyevlə qarşılaşmanın ilk hissəsində zədələnərək görüşü vaxtından əvvəl tərk etdiyindən bürünc medal uğrunda mübarizə aparmayıb və Qazyumov Olimpiadanı 3-cü yerdə başa vurub. Bu, onun Olimpiya Oyunlarında 2-ci, yığmamızın isə Londonda 6 bürünc medalı olub.

Azərbaycan Respublikasının Prezidenti İlham Əliyev avqustun 11-də XXX London Yay Olimpiya Oyunlarında inamlı qələbə qazanaraq qızıl medallar almaları münasibəti ilə sərbəst güləşçilərimiz Toğrul Əsgərovu, Şərif Şərifovu, məşqçilər Saypulla Absaidovu və Firdovsi Umudovu təbrik etmişdir.

Bu barədə Prezidentin mətbuat xidməti bildirib.

Dövlətimizin başçısı Azərbaycanın idman şərəfini layiqincə qoruyaraq əldə etdikləri böyük nailiyyəti yüksək qiymətləndirmiş, idmançılarımıza və onların məşqçilərinə yeni qələbələr arzulamışdır.

Azərbaycan güləşçisi Şərif Şərifov finalda rəqibini məğlub etdi.

Sərbəst güləş üzrə yarışda 84 kq çəki dərəcəsində mübarizəyə qoşulan Azərbaycan güləşçisi Şərif Şərifov finalda Puerto-Riko təmsilçisi Hayme Espinalı məğlub edərək Olimpiadanın çempionu oldu!

Azərbaycanlı olimpiya çempionu Toğrul Əsgərov yeni rekordçu olub. 

London Olimpiadasının qızıl medalını 20 yaşı tamam olmamış qazanan sərbəst güləşçimiz bununla da ən gənc Olimpiya çempionumuz olub. 60 kq-da çıxış edən Toğrul buna ad gününə az qalmış nail olub. Belə ki, o, 1992-ci ilin sentyabrın 17-də Gəncədə anadan olub və 20 illik yubileyinə 37 gün qalmış karyerasında ən böyük uğuruna imza atmaqla özünə ən yaxşı hədiyyə edib. Əsgərovla eyni gündə Olimpiya çempionu olan digər sərbəst güləşimiz Şərif Şərifov da gənc idmançı olsa da, ondan 4 yaş böyükdür.

Azərbaycanlı gimnast Aliyə Qarayeva London Yay Olimpiadasında çıxışını başa vurub.

Bu gün azərbaycanlı gimnast Aliyə Qarayeva London Yay Olimpiadasında növbəti sınağına çıxıb. Azerisport.az xəbər verir ki, fərdi çoxnövçülük yarışlarında qüvvəsini sınayan təmsilçimiz final mərhələsində ən güclü olmağa çalışıb.

Qeyd edək ki, Qarayeva təsnifat mərhələsində 23 idmançı ilə mübarizə aparırdı. Gimnastımız iki gün ərzində keçirilən təsnifat yarışlarını bütövlükdə 111.850 xalla üçüncü sırada tamamlamışdı və bu, finala çıxmaq üçün yetərli olmuşdu.

Bu gün Aliyə olimpiya medalını qazanmaq üçün çalışıb. Bu yolda onun 9 rəqibi var idi. Onunla yanaşı finala adlayan gimnastlar arasında yalnız iki nəfər təsnifat yarışları zamanı Azərbaycan təmsilçisindən daha yaxşı nəticə göstərmişdi. Bunlar rusiyalı Yevgeniya Kanayeva (116.000) və Dariya Dmitriyevadı (114.525). Bunlardan əlavə Silviya Miteva (Bolqarıstan, 110.925), Lyuba Çarkaşina (Belarus, 110.450), Yeon Son (Cənubi Koreya, 110.300), Alina Maksimenko (Ukrayna, 110.025), Yoanna Mitroş (Polşa, 109.750), Neta Rivkin (İsrail, 108.900), Ganna Rizatdinova (Ukrayna, 108.850) da Aliyə ilə mübarizə aparmaq şansına malik idi.

Finalda da atletlər dörd növ üzrə çıxış ediblər. Öncə həlqə ilə hərəkətlər yerinə yetirilib ki, bu zaman Aliyə səhnəyə 8-ci sırada çıxıb. O, ilk cəhdindən 27.925 xalla ayrılıb və 10 idmançı arasında altıncı olub. Maraq üçün xatırladaq ki, təsnifat mərhələsində Aliyə həlqə ilə hərəkətlərdə 27.450 xal toplaya bilmişdi.

Bundan sonra topla hərəkətlər olub. 6-cı sırada səhnəyə çıxan Aliyə 27.825 xal toplaya (təsnifat mərhələsində 28.350 xal toplamışdı) bilib. 55.750 xala malik təmsilçimiz iki hərəkətin cəminə görə ümumi sıralamada beşinci yeri tutub.

Gürzlə hərəkətlərdə Qarayeva 4-cü sırada çıxış edib. O, 27.575 xal (təsnifatda daha yaxşı nəticə göstərmişdi - 27.850) toplayıb. Ümumi xalını 83.325-ə çatdıran bu dəfə dördüncü olub.

Ən sonda lentlə hərəkətlər yerinə yetirilib. Səhnəyə ikinci çıxan Aliyə bu dəfə 28.250 xal yığıb (təsnifatda 28.200 toplamışdı).

Beləliklə, dörd hərəkətin cəmində 111.575 bal yığan Qarayeva sonda yalnız dördüncü yeri tutub.

Onu xilas etmək üçün dərəyə enən üç nəfər müxtəlif bədən xəsarətləri alıb

 Meyiti və yaralıları dərədən FHN-nin xilasediciləri çıxarıb

Azərbaycanın Lerik rayonunda bədbəxt hadisə baş verib. Lerik Rayon Prokurorluğundan Cənub bürosuna verilən məlumata görə, hadisə avqustun 10-da saat 22.30 radələrində Lənkəran-Lerik şose yolunun 22-ci kilometrliyində - istirahət mərkəzlərinin birinin yaxınlığında qeydə alınıb. Istirahət mərkəzindən geri qayıdan Bakı şəhər sakini, 24 yaşlı Günay Mirzağa qızı Babayeva əhvalının pisləşdiyini görüb sürücüdən maşını saxlamağı xahiş edib. Maşından düşən Günay Babayeva qəfildən sürüşərək təqribən 150 metrlik dərəyə yuvarlanıb. Bunu görən maşındakı digər sərnişin - Bakı şəhər sakini, 25 yaşlı Səid Tofiq oğlu Əliyev onu xilas etmək üçün dərəyə düşüb. Onların hər ikisindən xəbər çıxmayıb, buna görə Lənkəran şəhər sakinləri, 26 yaşlı Cavid Ədalət oğlu İsayev və 23 yaşlı Zaur Məsləhət oğlu Quluzadə onların ardınca dərəyə düşməyə cəhd ediblər. Hadisə yerinə Fövqəladə Hallar Nazirliyinin Cənub Regional Mərkəzinin xilasediciləri çağırılıb. Xilasedicilərin səyləri ilə dağ çayının kənarındakı dərədən Günay Babayevanın meyiti və müxtəlif bədən xəsarətləri almış digər üç yaralı çıxarılaraq aidiyyəti üzrə təhvil verilib.

 Faktla bağlı Lerik Rayon Prokurorluğunda araşdırma aparılır.

İranda episentri Təbriz şəhəri olan güclü zəlzələ baş verib.

Azərbaycan Milli Elmlər Akademiyasının Seysmoloji Xidmət Mərkəzi İranda baş vermiş və Azərbaycanda hiss edilən zəlzələ ilə bağlı məlumat yayıb.

Mərkəzdən daxil olan məlumata görə, zəlzələ İranın Təbriz şəhərindən 56 km şimali-şərqdə yerli vaxtla saat 17:23-də 6.2 baş gücündə baş verib. Daha sonra saat 17:30-da 6.2, 17:34-də 6.6 və 17:49-da 6.2 magnituda gücündə zəlzələ qeydə alınıb.

Zəlzələ Azərbaycanın əksər yaşayış məntəqələrində 4.5 baldan 2 bala qədər hiss olunub. Bu rayonlar Lənkəran, Astara, Masallı, Lerik, Cəlilabad, Salyan, Bərdə, Yevlax, Mingəçevir və digər yaşayış məntəqələridir.

Azərbaycan ərazisində insan tələfatı yoxdur.

Azərbaycan boksçusu Məhəmmədrəsul Məcidov (91 kq) Olimpiya Oyunlarının bürünc medalını qazanıb.

Yarımfinalda italyan boksçu Roberto Kammarelle ilə qarşılaşan Məcidov birinci raundda 6:4 hesabı ilə qələbə qazandı. Lakin ardınca gələn iki raundda Kammarelle üstün olub - 4:6 və 2:3.

Bakıda və Abşeron yarımadasında havanın yağmursuz keçəcəyi gözlənilir. Temperatur gecə 22-27, gündüz 32-37 dərəcə isti olacaqdır.

Bakıda gecə 24-26, gündüz 35-37 dərəcə isti olacağı gözlənilir. Atmosfer təzyiqi normadan aşağı 757 millimetr civə sütunu təşkil edəcək, nisbi rütubət gecə 65-75 faiz, gündüz 45-55 faiz olacaq.

Abşeronun çimərliklərində dəniz suyunun temperaturunun Sumqayıt, Novxanı, Pirşağı, Nardaran, Bilgəhdə, Zuğulbada 25-26, Buzovna, Mərdəkan, Şüvəlanda 26-27, Türkan, Hövsan, Sahil, Şıxda 28-29 dərəcə isti olacağı gözlənilir.

Naxçıvan Muxtar Respublikasında hava gündüz əsasən yağmursuz keçəcək. Temperaturun gecə 20-25, gündüz 35-39, bəzi yerlərdə 40 dərəcə isti olacağı gözlənilir.

Yuxarı Qarabağ: Xankəndi, Şuşa, Xocalı,Xocavənd, Qubadlı, Zəngilan, Laçın, Kəlbəcər,Daşkəsən, Gədəbəy rayonlarında hava gündüz əsasən, yağmursuz keçəcək. Temperaturun gecə 14-18, gündüz 27-32 dərəcə isti olacağı gözlənilir.

Qazax-Gəncə, Goranboy, Tərtər-Ağdam-Ağcabədi-Füzuli-Cəbrayıl rayonlarında hava əsasən yağmursuz keçəcək. Temperaturun gecə 21-25, gündüz 34-38 dərəcə isti olacağı gözlənilir.

Balakən-Zaqatala-Qax-Şəki-Oğuz-Qəbələ, İsmayıllı-Şamaxı-Ağsu-Xızı, Siyəzən-Şabran, Quba-Qusar-Xaçmaz rayonlarında hava gündüz əsasən, yağmursuz keçəcək. Temperaturun gecə 20-25, gündüz 32-37 dərəcə olacağı gözlənilir.

Mərkəzi-Aran: Ağdaş, Mingəçevir, Yevlax, Kürdəmir, İmişli, Beyləqan, Sabirabad, Biləsuvar, Saatlı, Şirvan, Hacıqabul, Salyan,Neftçala rayonlarında hava yağmursuz keçəcək. Temperaturun gecə 21-26, gündüz 35-38, bəzi yerlərdə 40 dərəcə isti olacağı gözlənilir.

Masallı-Lənkəran-Astara-Lerik və Yardımlı rayonlarında hava yağmursuz keçəcək. Temperaturun gecə 22-27, gündüz 34-39, dağlarda gecə 18-23, gündüz 28-32 dərəcə isti olacağı gözlənilir.

Beren Saat ilə sevgilisi Kənan Doğulu, Los Angelesdəki tatillerinin ilk 3 günündə sıx bir şəkildə alver etdi.

Kenan Doğulunun evində qalan sevgililər Amerikanın məşhur Outletlerinden geyim, çanta və ayaqqabı aldı. Bunun üçün də 50 min TLə yaxın pul xərclədilər. Amerikada 20 gün daha qalacaq olan Beren Saat ilə Kənan Doğulu çemodanlarını Türkiyəyə gəlmədən əvvəl kargo ilə göndərəcək.