Xəbərlər

Xəbər verdiyimiz kimi, avqustun 21-də Azərbaycan Respublikasının Prezidenti İlham Əliyevin tapşırığına əsasən, Fövqəladə Hallar Nazirliyi (FHN) Gürcüstanın Borjomi-Xaraqulsk qoruğunda baş vermiş meşə yanğınlarının söndürülməsinə kömək məqsədilə helikopter göndərib.

FHN-in Aviasiya dəstəsinə məxsus, xüsusi avadanlıqla təchiz olunmuş “Ka-32A” helikopteri 11 nəfərlik şəxsi heyəti ilə avqustun 22-də saat 06:30 radələrindən Borjomi-Xaraqulsk qoruğunda kəşfiyyat uçuşlarına başlayıb və 06:40 radələrindən yanğının söndürülməsi əməliyyatına qoşulub.

Eyni zamanda, Gürcüstan Hökumətinin müraciətinə əsasən, Azərbaycan Prezidenti İlham Əliyevin tapşırığı ilə Gürcüstanın Borjomi-Xaraqulsk qoruğunda baş vermiş meşə yanğınlarının söndürülməsinə kömək məqsədilə avqustun 22-də FHN-in xilasetmə və yanğınsöndürmə texnika və avadanlığı ilə təchiz olunmuş xüsusi xilasetmə dəstəsi Gürcüstana yola düşüb. Barjomi-Xaraqulsk qoruğunda meşə yanğınlarının söndürülməsində iştirak edən xilasetmə dəstəsinə FHN-in Dövlət Yanğından Mühafizə Xidmətinin və Mülki Müdafiə Qoşunlarının müvafiq yanğınsöndürmə texnikaları və şəxsi heyəti (fərdi yanğınsöndürmə vasitələri ilə təchiz edilmiş) cəlb olunub.

Həmçinin Nazirliyin Xüsusi Riskli Xilasetmə Xidmətinin yanğının baş verdiyi mürəkkəb relyefli ərazilərdə daha operativ xilasetmə və yanğınsöndürmə əməliyyatları aparılması məqsədilə xüsusi hazırlıq keçmiş 26 xilasedicisi Dövlət Sərhəd Xidmətinin iki helikopteri ilə hadisə yerinə desant çıxarılıb.

1news.az-a FHN-in mətbuat xidmətindən verilən xəbərə görə, avqustun 23-də və 24-də nazirliyin Gürcüstanın Borjomi-Xaraqulsk qoruğunda baş vermiş meşə yanğınlarının söndürülməsi əməliyyatlarında iştirak edən yanğınsöndürmə-xilasetmə dəstəsi onlara həvalə olunmuş ərazilərdəki yanğın ocaqlarını söndürüblər.

Hazırda FHN-in bölgəyə cəlb edilmiş qüvvələri onlara həvalə edilən mürəkkəb relyefə malik ərazilərdəki digər yanğın ocaqlarının söndürülməsi istiqamətində yanğınsöndürmə əməliyyatlarını uğurla davam etdirirlər.

Bundan əlavə, FHN hadisə rayonuna ezam edilmiş yanğınsöndürmə-xilasetmə dəstəsinin operativ və səmərəli fəaliyyətinin, gündəlik həyat təminatının və istirahətinin təmin edilməsindən ötrü səhra şəraiti üçün nəzərdə tutulmuş çadırlar qurub və səyyar mətbəx quraşdırıb.

Qeyd edək ki, Azərbaycan Respublikasının Prezidenti İlham Əliyevin tapşırığına əsasən, təbii fəlakət zonasına Azərbaycanın Fövqəladə Hallar Nazirliyinin 22 texnikası, o cümlədən 1 helikopteri və 131 nəfərlik canlı qüvvəsi, Dövlət Sərhəd Xidmətinin 2 helikopteri və 6 nəfərlik heyəti cəlb edilib.

S.Xankişiyeva