Xəbərlər

Bu gün 2017/2018-ci tədris ili üçün respublikanın ali təhsil müəssisələrinə bütün ixtisas qrupları (I –IV) üzrə ixtisas seçimi başa çatır.

1news.az-ın Dövlət İmtahan Mərkəzinə istinadən verdiyi xəbərə görə, iyulun 29-dan başlayan ixtisas seçimi avqustun 10-u saat 23:29-da başa çatacaq və qeyd olunan müddət uzadılmayacaq.

Abituriyentlər müsabiqədə iştirak etmək üçün göstərilən vaxtadək öz ixtisas seçimi ərizəsini təsdiqləməlidirlər. Əks təqdirdə onlar müsabiqədə iştirak edə bilməyəcəklər.

Avqustun 10-da saat 10:00-a olan məlumata əsasən, 40 min 681 abituriyent bakalavriat səviyyəsi üzrə ali təhsil müəssisələrinə elektron ixtisas seçimi edib. Onlardan 36 min 927-si Azərbaycan, 3 min 754-ü isə rus bölmələrində təhsil alan abituriyentlərin payına düşür.

Bakalavriat səviyyəsi üzrə ali təhsil müəssisələrinə elektron ixtisas seçimi ərizələrinin sayı birinci ixtisas qrupu üzrə daha çox müşahidə olunub. Beləliklə, artıq 14 min 392 abituriyent birinci qrup üzrə ixtisasını seçib.

Babək Cahandarov