Xəbərlər

Bu gün SOCAR-ın prezidenti Rövnəq Abdullayev IBM şirkətinin nümayəndə heyətini qəbul edib.

SOCAR-dan 1news.az-a verilən məlumata görə, R. Abdullayev Azərbaycanda həyata keçirilən irimiqyaslı enerji layihələrində innovativ texnologiyalara üstünlük verildiyini, neft-qaz əməliyyatlarında ən son texniki nailiyyətlərin tətbiq olunduğunu qeyd edib və bir neçə ay əvvəl SOCAR və IBM arasında bu istiqamətdə qarşılıqlı səmərəli əməkdaşlığın qurulduğunu bildirib.

IBM şirkətinin Mərkəzi və Şərqi Avropa üzrə baş direktoru Antonio Muttoni görüş üçün təşəkkürünü bildirərək qeyd edib ki, son 10 ildə Azərbaycan iqtisadiyyatı fenomenal yüksəliş dövrünü yaşayır. SOCAR - IBM əməkdaşlığı Azərbaycanda yüksək texnologiyaların daha sürətlə inkişafına xidmət edəcəkdir. SOCAR və IBM arasında Strateji Əməkdaşlıq Memorandumunun imzalanmasından ötən 3 ay ərzində görülən işlərin müzakirə olunduğu görüşdə qeyd edilib ki, Memorandum IBM-in qlobal innovasiyalarından istifadə, rəqəmsal innovasiya və transformasiya, neft hasilatında süni intellekt əsasında Watson əməkdaşlığı, yüksək ixtisaslı kadrlar üçün yeni iş yerlərinin açılması, həmçinin Bakı Ali Neft Məktəbi ilə birgə təlim-tədris və təcrübə proqramlarının təşkili sahələrində elmi-tədqiqat və araşdırmaların aparılması nəzərdə tutur.

SOCAR ilə əməkdaşlığı yüksək qiymətləndirən IBM şirkətinin vitse-prezidenti və Avropa üzrə kimya və neft sənayesi üzrə rəhbəri Rac Raiçura görülən işlər və qarşıda duran vəzifələr barədə məlumat verib, əməkdaşlığın yol xəritəsinə dair təqdimatla çıxış edib. Qeyd olunub ki, IBM - SOCAR-ın və özünün neft-qaz sahəsindəki zəngin təcrübələrinə əsaslanaraq Xəzər hövzəsi ölkələrində fəaliyyətini genişləndirmək niyyətindədir.

SOCAR-ın neft-qaz kəşfiyyatı və hasilatı sahəsində malik olduğu məlumatlar Watson və Big Data təhlillərində istifadə olunaraq, dünya neft sənayesi üçün yeni imkanlar açacaq. İstedadlı gənclərə IBM-in bütün müasir alət və metodlarından istifadə imkanı verməklə onların səriştə və istehsalat bacarıqlarını təkmilləşdirmək, biznes və proses xidmətlərinin robotlaşdırılması üzrə dünya praktikası ilə yaxından tanış olmaq, təcrübə mübadilələri və beynəlxalq səviyyəli karyera perspektivlərindən yararlanması üçün əlverişli şərait yaratmaq nəzərdə tutulur. SOCAR-IBM əməkdaşlığının region ölkələrindəki sürətlə inkişaf edən bazarlarda genişlənmək imkanı yaradacağı vurğulanıb. Bu tərəfdaşlığın həmçinin dünya enerji sənayesinin gələcək inkişafına xidmət edəcəyinə əminlik ifadə olunub.

Görüşdə tərəfləri maraqlandıran digər məsələlər ətrafında da müzakirələr aparılıb.

1news.az