Xəbərlər

Bu gün Bakıdakı Heydər məscidində ötən il Türkiyədə baş vermiş dövlət çevrilişi cəhdinin qarşısı alınarkən şəhid olmuş insanların xatirəsinə vəhdət namazı qılınır.

1news.az xəbər verir ki, Heydər məscidinin dini rəhbəri Hacı Sabirin rəhbərliyi ilə qılınan namazda Qafqaz Müsəlmanları İdarəsinin sədri Şeyxülislam Hacı Allahşükür Paşazadə, Türkiyənin Azərbaycandakı səfiri Erkan Özoral, Dini Qurumlarla İş üzrə Dövlət Komitəsinin sədri Mübariz Qurbanlı və din xadimləri iştirak ediblər.

Mərasim dövlət çevrilişi cəhdinin qarşısının alınması zamanı həlak olanların ruhuna Qurani Kərimdən ayələrin oxunması ilə başlayıb.

Sonra vəhdət namazı qılınıb. Müxtəlif məzhəblərə mənsub şəxslər birgə namaza qoşulublar.

Qeyd edək ki, bu gün Azərbaycanın bütün məscidlərində türk dövlətçiliyi naminə canlarını fəda etmiş qəhrəman şəhidlərin xatirəsi yad olunur, ruhlarına dualar oxunur. Azərbaycanlı dindarlar qardaş ölkə xalqı ilə həmrəylik nümayiş etdirirlər.

1news.az