Xəbərlər

Artıq bu gün Sportster meydanlarında dünyanın ən güclü fristayleri Sian Qarnyerin möhtəşəm şousu baş tutacaq.

Onun komandası “Street Style Societe” (S3) Azərbaycanın birinci Mini Futbol Liqasının (MFL) ən yaxşı futbolçuları ilə yarışacaq - Street Style Societe VSMFL All Stars.

Bu gün Sian Qarnyenin möhtəşəm şou ərəfəsində 1news.az-a müsahibə verib. Müsahibənin geniş mətni ilə yaxın zamanlarda tanış ola bilərsiniz. Hələlik isə Sianla söhbətin bəzi məqamlarını diqqətinizə çatdırmaq istəyirik:

– Sevimli fəndiniz – ayaqlar arasından topun ötürülməsidir. MFL All Stars-a qarşı bugünkü oyunda neçə fənd istifadə edəcəksiniz?

– İlk olaraq qeyd edim ki, indi hansısa fənd nümayiş etdirmək çətindir. Məsələ burasındadır ki, əvvəllər məni az adam tanıyırdı. Ona görə də istənilən hiyləni etmək asan idi. Hazırda isə rəqibini udmaq çox çətindir. Belə ki, onlar mənim nə etdiyimi bilirlər və oyuna hazırlıqlı gəlirlər.

Hər dəfə topu ötürəndə bilmirəm hər hansı hiylə etməyim baş tutacaq, ya yox. Və bu, videoda necə görünəcək. İki çıxış yolum var – ya fənd etməyi bacaracağam, ya da səhv edərək uduzacağam.

Yarış zamanı rəqibimi qiymətləndirirəm və xal qazanmaq üçün yollar axtarıram. Əgər rəqibim mənim üstümə gələrsə, bu zaman fənd istifadə etməyə başlayıram. Bu gün isə şou xatirinə oynayacağıq. Buna görə də əlimdən gələni əsirgəməyəcəyəm.

- Azərbaycan futbolu və ya futbolçuları haqda nə bilirsiniz?

- Azərbaycan futbolu ilə bağlı çox az məlumatlara sahibəm, lakin Azərbaycan futzalını yaxşı tanıyıram. İdmanın bu növünü çox sevirəm. Buna görə də Avropa Çempionatları və UEFA turnirlərini izləyirəm. Burada dəfələrlə azərbaycanlı oyunçularla qarşılaşmışam.

- Söylədiniz ki, dünən MFL-lə bağlı bir neçə video-çarxa baxmısınız. Mini Futbol Liqası haqda nə deyə bilərsiniz?

- Artıq bilirəm ki, MFL-də müxtəlif oyunçular var, tamaşaçılar oyunlara gəlir. Və onlar bu oyunu sevirlər. MFL mənə böyük mehriban ailəni xatıladır. Bu, çox sevindirici haldır ki, müxətlif insanlar bir yerdə toplaşaraq bir-birlərinə qarşı oynayır, həmçinin buna sevinirlər. Onlarla bu gün qarşılaşmaq çox maraqlı olacaq.

- MFL-də oynayanlara hansı məsləhətləri verərdiniz?

- İlk olaraq məsləhət görərdim ki, oyundan zövq alsınlar və sevinsinlər. Əgər nəyəsə nail olmaq və qələbə qazanmaq istəyirsinizsə, meydanda bütün bilgilərinizi göstərin və çalışın ki, orijinal olasınız.

- Bilirsiniz ki, MFL All Stars sizi udmağa hazırlaşır?

- Bu, problem deyil – onlar bizi udmağa çalışa bilərlər. Lakin ayaqlarını çarpaz saxlasınlar (gülür).

Teymur Maqsutov

Tərcümə: S.Xankişiyeva