Xəbərlər

ABŞ prezidenti Donald Tramp ABŞ-ın İqlimə dair Paris sazişindən çıxdığını bəyan edib.

1news.az-ın “RİA Novosti”yə istinadən verdiyi xəbərə görə, bu barədə D. Tramp keçirdiyi mətbuat konfransı zamanı bildirib. Onun sözlərinə görə, Paris sazişinin maliyyə yükü əsasən amerikalıların üzərinə düşür. 

“Biz Paris sazişini tərk edirik, lakin Amerika biznesi, fəhlələri və vergi ödəyiciləri üçün ədalətli şərtlərə əsaslanan bu və ya digər sazişə qoşulmağa dair danışıqlara yenidən başlayacağıq”, - deyə prezident qeyd edib.  

Tramp qeyd edib ki, ABŞ-ın sonrakı addımları ədalətli razılaşma əldə edilməsinin  mümkünlüyündən asılı olacaq. Bununla belə o, ətraf mühitin qorunması məsələlərində ABŞ-ın dünya lideri mövqeyini qoruyacağını da bəyan edib. 

Qeyd edək ki, 2015-ci ilin dekabrında imzalanan İqlimə dair Paris sazişi iqlim sahəsində əldə olunan ilk razılaşmadır. Dünyanın 194 ölkəsi tərəfindən imzalanan bu saziş qlobal istiləşmənin qarşısının alınması üzrə beynəlxalq fəaliyyət planını müəyyənləşdirir.

Babək Cahandarov