Xəbərlər

Dövlət Sərhəd Xidməti (DSX) Vətənimizin müqəddəs sərhədlərinin toxunulmazlığını yüksək səviyyədə təmin etməklə yanaşı, ölkəmizdə sərhəd mühafizə infrastrukturunun təkmilləşdirilməsi, bütün hərbi hissə və bölmələrdə müasir tələblərə cavab verən yeni sərhəd məntəqələrinin tikilib istifadəyə verilməsi, sərhədçilərin xidmət və məişət şəraitinin yaxşılaşdırılması tədbirlərini müvəffəqiyyətlə davam etdirir.

Dövlət Sərhəd Xidməti Hava Nəqliyyatında Sərhəd Nəzarəti Dəstəsinin yeni inşa edilmiş inzibati binası bu istiqamətdə həyata keçirilmiş məqsədyönlü tədbirlərin növbəti nəticələrindən biridir.

Dövlət Sərhəd Xidmətinin mətbuat mərkəzindən 1news.az-a verilən məlumata görə, mayın 9-da Hava Nəqliyyatında Sərhəd Nəzarəti Dəstəsinin yaradılmasının 25 illiyi və yeni inşa edilmiş inzibati binasının açılışı münasibətilə təntənəli mərasim keçirilib.

Mərasimdə çıxış edən Dövlət Sərhəd Xidmətinin rəisi-Sərhəd Qoşunlarının Komandanı, general-polkovnik Elçin Quliyev ulu öndər Heydər Əliyevin və Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin ali diqqəti sayəsində Dövlət Sərhəd Xidməti tərəfindən əldə olunmuş xidməti nailiyyətlər barədə danışıb, Ali Baş Komandanın etimadı ilə fəxr edən Azərbaycan sərhədçıləri üçün dövlətçiliyimizin və sərhədlərimizin keşiyində durmağın böyük şərəf və yüksək məsuliyyət olduğunu bildirib.

Çıxış edənlər Dövlət Sərhəd Xidmətinin Hava Nəqliyyatında sərhəd nəzarəti dəstəsinin fəaliyyətə başladığı gündən respublikamızın əsas giriş-çıxış qapılarında dövlət sərhədindən keçən şəxslərə, nəqliyyat vasitələrinə və yüklərə etibarlı sərhəd nəzarətini həyata keçirdiyini, müstəqilliyimizin ilk illərində əzmkarlıq və iradə nümayiş etdirdiyini, böyük inkişaf yolu keçərək formalaşdığını vurğulayıblar.

Tədbirdə xidmətdə yüksək nəticələr göstərmiş bir qrup hərbi qulluqçu təltif olunub.

Hava Nəqliyyatında Sərhəd Nəzarəti Dəstəsinin yeni inzibati binasının rəmzi açılışını bildirən lent kəsildikdən sonra Dövlət Sərhəd Xidmətinin rəisi-Sərhəd Qoşunlarının Komandanı, general-polkovnik Elçin Quliyev, Dövlət Gömrük Komitəsinin sədri, gömrük xidməti general-polkovniki Aydın Əliyev, “Azərbaycan Hava Yolları” QSC-nin prezidenti Cahangir Əsgərov və digər qonaqlar ulu öndər Heydər Əliyevin büstü önünə gül dəstələri qoyublar. Sonra inzibati binaya baxış keçirilib.

Ümumi ərazisi 0,6 hektar olan dördmərtəbəli qərargah binasında xidməti və xüsusi təyinatlı otaqlar, müxtəlif yığıncaqların və tədbirlərin keçirilməsi üçün konfrans zalı, təlim mərkəzi yaradılıb. Qərargah binasında xidmətin yüksək standartlara və günün tələblərinə uyğun şəkildə təşkil olunması üçün zəruri şərait yaradılıb, bina lazımi avadanlıqlar və vasitələrlə təmin olunub.

1news.az