Xəbərlər

Aprelin 27-də Dini Qurumlarla İş üzrə Dövlət Komitəsi (DQİDK), Azərbaycan Respublikası Prezidenti yanında Bilik Fondu və Şirvan Şəhər İcra Hakimiyyətinin  birgə təşkilatçılığı ilə Şirvan Dövlət İqtisadiyyat və Humanitar Kollecində konfrans keçirilib.

1news.az xəbər verir ki, Prezident İlham Əliyevin Sərəncamı ilə 2017-ci ilin ölkəmizdə “İslam Həmrəyliyi İli” elan edilməsi ilə bağlı təsdiq olunmuş Tədbirlər Planına uyğun olaraq “İslam həmrəyliyi: müasir çağırışlar və dini maarifləndirmə” mövzusunda keçirilən konfransda Dini Qurumlarla İş üzrə Dövlət Komitəsinin sədr müavini Gündüz İsmayılov, Dini maarifləndirmə işinin təşkili şöbəsinin müdir müavini Ruslan Əsgərov, Şirvan şəhər İcra Hakimiyyəti başçısının müavini Elmira Ağayeva, İctimai-siyasi və humanitar məsələlər üzrə şöbənin müdir müavini-dini qurumlarla işin təşkilatçısı Adəm Hüseynov, AR Prezidenti yanında Bilik fondunun sektor müdiri Hacı Abdulla, kollecin direktoru Balamirzə Məmmədov, Şirvan şəhər Təhsil şöbəsinin müdiri Rövşən Allahverdiyev,  DQİDK-nın Şirvan bölgəsi üzrə şöbəsinin müdiri Azər Sadıqov, eləcə də kollecin müəllim-tələbə heyəti iştirak ediblər.

Tədbiri giriş sözü ilə açan Şirvan şəhər İcra Hakimiyyəti başçısının müavini Elmira  Ağayeva ölkəmizdə dinə dövlət qayğısından və Dini Qurumlarla İş üzrə Dövlət Komitəsinin həyata keçirdiyi dini maarifləndirmə tədbirlərinin  önəmindən danışıb.

DQİDK-nın sədr müavini Gündüz İsmayılov çıxışında bildirib ki, regionlarda keçirilən bu konfransların məqsədi Azərbaycanın müxtəlif bölgələrində cəmiyyətin, xüsusilə də gənc nəslin ənənəvi dini və milli dəyərlərimiz, bu dəyərlərin ümdə prinsipləri haqqında doğru və sağlam mənbələrə əsaslanan biliklərlə təmin olunması, dini mühitdə radikallığa meyillərin səbəbinin öyrənilməsi, dəyərləndirilməsi, bu meyillərin qarşısının alınması üçün səmərəli metodların aşkara çıxarılması, bu sahədəki kompleks tədbirlərin effektinin daha da artırılmasıdır.

Sədr müavini dini radikalizmin və ekstremizmin milli kimliyimizə qarşı yaratdığı təhdidlərdən, ənənəvi İslam anlayışının mahiyyətindən danışıb.

2017-ci ilin “İslam Həmrəyliyi İli” elan olunmasının önəmindən danışan G.İsmayılov bu təşəbbüsün İslam dünyasına, eləcə də dünyaya mesaj xarakteri daşıdığını bildirib. O, qeyd edib ki, dünyada artıq uzun illərdir ki, məqsədyönlü şəkildə islamofobiya hökm sürür, İslam ölkələrinin əleyhinə kampaniya aparılır. Belə amillərə qarşı mübarizə aparmaq və bunun üçün də həmrəylik nümayiş etdirmək lazımdır.

Daha sonra çıxış edən AR Prezidenti yanında Bilik fondunun sektor müdiri Hacı Abdulla bildirib ki, dini maarifləndirmə və milli-mənəvi dəyərlərin təbliği, həmçinin dini radikallığın, onu törədən səbəblərin aradan qaldırılması sahəsində ölkəmizdə aparılan genişmiqyaslı işlər, həyata keçirilən tədbirlər də öz müsbət nəticəsini verir.

Sonda Kollecin müəllim-tələbə heyətinin mövzu ilə bağlı çoxsaylı sualları cavablandırlıb, təklif və mülahizələri dinlənilib.

1news.az