Xəbərlər

Avropada yaşayan azərbaycanlılar fevralın 16-da Almaniyanın Münxen şəhərində Xocalı soyqırımının 25-ci ildönümü ilə bağlı etiraz aksiyası keçiriblər. Aksiyada 250-dən çox həmvətənimiz iştirak edib.

Münxen Təhlükəsizlik Konfransının keçirildiyi “Bayerişer Hof” otelinin önündə baş tutan aksiyanı Avropa Azərbaycanlıları Konqresi, Bielefeld Azərbaycan Mədəniyyət Mərkəzi, Bakı Nurnberq Mədəniyyət və Təhsil Cəmiyyəti, Münxendə fəaliyyət göstərən türk diaspor təşkilatları birgə təşkil ediblər.

Aksiyada “Xocalıya ədalət!”, “Ermənistan, işğaldan və terrordan əl çək!”, “Biz torpaqlarımızı hökmən azad edəcəyik!”, “Dilqəm Əsgərova və Şahbaz Quliyevə azadlıq!”, “Xocalı soyqırımı insanlığa qarşı cinayətdir!”, “Biz terrora və soyqırımına yox deyirik!” kimi şüarlar səsləndirilib, plakatlar qaldırılıb.

Tədbirdə çıxış edən azərbaycanlılar beynəlxalq ictimaiyyətdən Ermənistanın təcavüzkar, işğalçı siyasətinə qarşı qətiyyətli mövqe nümayiş etdirməyi, bəşər tarixinin ən dəhşətli cinayətlərindən biri olan Xocalı soyqırımına hüquqi qiymət verməyi tələb ediblər. Həmvətənlərimiz Prezident İlham Əliyevin Ermənistan-Azərbaycan, Dağlıq Qarabağ münaqişəsinin həlli istiqamətində siyasətini dəstəklədiklərini, Azərbaycan dövləti ilə həmrəyliklərini, torpaqlarımızın işğaldan azad edilməsi üçün əllərinə silah götürməyə hazır olduqlarını bildiriblər. Soydaşlarımız Azərbaycan Prezidentinin münaqişənin həllinə yönəlmiş siyasətinin regionda sülhün və sabitliyin təmin olunmasına xidmət etdiyini vurğulayıblar. Qeyd olunub ki, dövlətimizin başçısının uğurlu siyasəti nəticəsində Azərbaycan güclü, beynəlxalq aləmdə öz sözünü deməyə qadir bir dövlət kimi tanınmaqdadır və bu, bütün dünya azərbaycanlılarında qürur doğurur.

Mitinqdə iştirak edən soydaşlarımız bir milyondan çox həmvətənimizin məcburi köçkünə çevrilməsinə, Ermənistanın təcavüzü nəticəsində doğma torpaqlarından didərgin düşmüş azərbaycanlıların hüquqlarının pozulması faktına dünya ictimaiyyətinin, beynəlxalq təşkilatların laqeyd münasibətinin ciddi narahatlıq doğurduğunu vurğulayıblar.

Aksiyada son dövrlərdə Ermənistan silahlı qüvvələrinin cəbhə xəttində atəşkəsi mütəmadi olaraq pozmasının, Azərbaycan Ordusunun mövqelərini, habelə yaşayış məntəqələrində mülki əhalini atəşə tutmasının, təmas xəttində təxribatlar törətməsinin dərin narahatlıq doğurduğu vurğulanıb.

Sonda mitinq iştirakçılarının bəyanatı oxunub.

1news.az