Xəbərlər

Oktyabrın 31-də II Azərbaycan Elm Festivalı öz işinə başlayıb.

1news.az-ın məlumatına görə, Azərbaycan Milli Elmlər Akademiyasının təşəbbüsü ilə keçirilən və noyabrın 5-dək davam edəcək festivalın açılış mərasimi olub.

UNESCO, Azərbaycan Respublikası Təhsil Nazirliyi, Azərbaycan Respublikası Rabitə və Yüksək Texnologiyalar Nazirliyi, Bakı Şəhər İcra Hakimiyyəti, Azərbaycan Respublikasının Prezidenti yanında Bilik Fondu, Azərbaycan Respublikasının Prezidenti yanında Elmin İnkişafı Fondu, ABŞ-ın Azərbaycandakı səfirliyi və Moskva Dövlət Universitetinin təşkilati dəstəyi ilə keçirilən festival Fəxri Xiyabanı ziyarət ilə başlayıb.

AMEA-nın Əsas binasında təşkil olunmuş tədbiri giriş sözü ilə açan AMEA-nın prezidenti, akademik Akif Əlizadə festivalın ölkəmiz və elmimiz üçün mühüm əhəmiyyətindən danışıb. Bildirib ki, bu gün həm elmimiz, həm də AMEA-nın böyük bayramıdır.

II Azərbaycan Elm Festivalının ümumilikdə dövlət, cəmiyyət qarşısında böyük hesabat olduğunu deyən akademik A.Əlizadə qeyd edib ki, elmin populyarlaşdırılmasında bu festivalın rolu danılmazdır. 2014-cü ildə keçirilmiş I Elm Festivalında 15 mindən artıq insanın iştirak etdiyini xatırladan AMEA rəhbəri bu dəfə festivalda iştirak edəcək insanların sayının 50 minə çatacağının gözlənildiyini vurğulayıb. Akademik A.Əlizadə qeyd edib ki, festival öz işinə noyabrın 1-də Naxçıvanda, noyabrın 2-də Sumqayıtda, noyabrın 4-də Şəkidə və noyabrın 5-də Gəncədə davam edəcək.

Akademiyanın bütün elmi müəssisə və təşkilatlarının festivalda yüksək səviyyədə iştirak etdiyini söyləyən AMEA rəhbəri Azərbaycanda elmin inkişafı və qarşıda duran vəzifələrdən danışıb, festivala hazırlıq prosesini yüksək qiymətləndirib və iştirakçılara uğurlar arzulayıb.

Sonra Azərbaycan Respublikasının dövlət himni səsləndirilib.

Tədbirdə çıxış edən təhsil naziri Mikayıl Cabbarov, Bakı Ali Neft Məktəbinin rektoru Elmar Qasımov, Bakı Dövlət Universitetinin rektoru, akademik Abel Məhərrəmov festival haqqında fikirlərini bölüşüblər. Natiqlər sözügedən festivalın Azərbaycan elminin inkişafı və əldə olunan nailiyyətlərin təbliğinə böyük tövhə olduğunu qeyd ediblər.

Çıxışlardan sonra tədbirin bədii hissəsi başlayıb. AMEA-nın Marşı səsləndirilib, müxtəlif elmi şoular nümayiş olunub, həmçinin ABŞ-ın “Acidic Band” qrupu çıxış edib.

Daha sonra AMEA rəhbərliyi, digər rəsmi şəxslər və fəxri qonaqlar Alimlər evində təşkil edilmiş sərgi ilə tanış olublar.

Festival Mərkəzi Elmi Kitabxana, Geologiya və Geofizika İnstitutu, Kataliz və Qeyri-üzvi Kimya İnstitutu, Fizika İnstitutu, Bakı Dövlət Universiteti, Ali Neft Məktəbi, 132-134 nömrəli Təhsil Kompleksində təşkil olunmuş elmi-populyar mühazirələr ilə davam edir.

Gün ərzində bir sıra muzey, texnopark və digər məkanlara elmi ekskursiyalar təşkil olunacaq.

Festival öz işinə regionlarda davam edəcək.

1news.az