Xəbərlər

Oktyabrın 11-dən start verilən stolüstü tennis üzrə gənclər və yeniyetmə idmançılar (1999-2001, 2002-ci il və daha kiçik təvəllüdlü) arasında Azərbaycan Kuboku uğrunda yarışlar başa çatıb.

1news.az-ın məlumatına görə, “Şüa” İdman-Sağlamlıq Kompleksində Gənclər və İdman Nazirliyinin və Azərbaycan Stolüstü Tennis Federasiyasının birgə təşkilatçılığı ilə baş tutan və şəxsi-komanda xarakteri daşıyan yarışda Bakı və Sumqayıt şəhərlərindən, eləcə də respublikanın digər bölgələrindən 130-a yaxın idmançı iştirak edib.

Oktyabrın 15-də yarışlara yekun vurulub. Bu münasibətlə keçirilən tədbirdə çıxış edən Azərbaycan Stolüstü Tennis Federasiyasının vitse-prezidenti Fazil Məmmədov ölkəmizdə idmana böyük diqqət və qayğı göstərildiyini, müasir standartlara cavab verən idman və sağlamlıq infrastrukturunun yaradıldığını vurğulayıb.

Bütün bunların nəticəsidir ki, bu gün Azərbaycan bir sıra mötəbər tədbirlərlə yanaşı, beynəlxalq idman yarışlarına da ev sahibliyi edir. F.Məmmədov son illərdə stolüstü tennisin inkişafı istiqamətində görülən işlərdən bəhs edib, qalibləri təbrik edib. Qalib idmançılara diplom, kubok və mükafatlar, təqdim olunub.

Tədbirdə Azərbaycan Stolüstü Tennis Federasiyasına yeni təyin olunmuş vitse- prezident Səbuhi Mehdizadə idman ictimaiyyətinə təqdim olunub.

1news.az