Xəbərlər

Məlum olduğu kimi, dünən axşam saatlarından başlayaraq Bakıya güclü yağış yağıb.

1news.az-ın məlumatına görə, yağış nəticəsində paytaxtın köhnə problemləri bir daha özünü büruzə verib. Belə ki, yağış nəticəsində yollar və küçələrdən sel keçib, bəzi ərazilərində fərdi yaşayış evlərinin həyətyanı sahələri, küçə və prospektlər yağış suları ilə dolub, nəqliyyatın hərəkətində məhdudiyyət yaranıb. Yeraltı dayanacaqlar, zirzəmilər də suya qərq olub.

Yağış iş saatının sonunda gücləndiyindən yollarda uzun tıxaclar yaranıb, bəzi maşınlar suda batıb.

İşdən çıxan insanların bir çoxu evə getmək üçün gec saatlarına qədər gözləyiblər, imkanı olanlar isə evə taksi ilə getməli olublar.

Yağışların törətdiyi fəsadların aradan qaldırılması üçün Fövqəladə Hallar Nazirliyinin Xüsusi Riskli Xilasetmə Xidməti və Dövlət Yanğından Mühafizə Xidmətinin canlı qüvvə və texnikası cəlb olunub. Maşınlarda köməksiz qalan insanlar xilas edilib, küçə və prospektlərdən su çəkilib.

1news.az