Xəbərlər

8-13 noyabr 2016-cı il tarixlərində Azərbaycan Respublikasının Koreya Respublikasındakı Səfirliyinin təşəbbüsü və Koreya Xarici İşlər Nazirliyinin təşkilatçılığı ilə “Türkdilli Dövlətlərin Mədəniyyət Festivalı” keçiriləcək.

1news.az-a səfirlikdən verilən xəbərə görə,  festivalda Azərbaycanla yanaşı, Türkiyə, Türkmənistan, Qazaxıstan və Qırğızıstanın mədəniyyət xadimlərindən ibarət nümayəndə heyətləri iştirak edəcək.

8 noyabr tarixində paytaxt Seulda yerləşən Koreya Milli Muzeyində iştirakçı ölkələrin mədəniyyət xadimlərinin birgə iştirakı ilə Festivalın açılış mərasimi keçiriləcəkdir.

9 noyabr tarixində Seulda Azərbaycan günü, 13 noyabr tarixində isə Qimhe şəhərində Azərbaycan, Qazaxıstan və Qırğızıstan mədəniyyət xadimlərinin iştirakı ilə birgə konsert keçiriləcək.

Festivalda Azərbaycanı Milli İnstrumental Ansamblı, Azərbaycan Mahnı və Rəqs Ansamblı, “Natiq” ritm qrupu, Elçin Şirinov və caz qrupu təmsil edəcəkdir.

Konsert proqramlarına paralel olaraq tədbirin keçiriləcəyi Koreya Milli Muzeyinin lobbisində Azərbaycanın tarixi, mədəniyyəti, milli mətbəxi, təbiəti, müasir arxitekturasını əks etdirən foto, həmçinin milli geyim sərgisi nümayiş etdiriləcək.

Festival çərçivəsində 11 noyabr tarixində Rövşən İsaxın Koreya dilində subtitrlə hazırlanmış “Aktrisa” filmi nümayiş etdiriləcək.

Festivalda Azərbaycan nümayəndə heyətinin iştirakı, foto və milli geyimlərin nümayişi, habelə film festivalı üçün Azərbaycan filminin təmin edilməsi AR Mədəniyyət və Turizm Nazirliyi, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyası və Bakı Media Mərkəzinin dəstəyi ilə həyata keçirilir.

1news.az