Xəbərlər

İyulun 28-də Bakı-Şamaxı yolunda polis əməkdaşı ilə sürücü arasında əlbəyaxa dava olub.

1news.az xəbər verir ki, bu barədə avtosfer.az-a hadisə şahidləri məlumat veriblər.

Bildirilir ki, 90 PC 329 dövlət nömrə nişanlı avtomobildən taksi kimi istifadə edən sürücü iki xanım müştəri ilə Bakıya gələrkən Müşfiq postuna çatmağa az qalmış dövlət nömrə nişanları yerində olmayan “Toyota” markalı avtomobildə olan polis əməkdaşı onu saxlatdırıb.

Şahidlər bildirir ki, yolun kənarında dayanmış “Toyota”da olan polis işıqları yandırıb-söndürdüyü üçün taksi sürücüsü ona kömək lazım olduğunu zənn edərək maşını saxlayıb. Polis əməkdaşı qəflətən sürücüyə hücum çəkərək maşında qanunsuz səs siqnalı olduğunu bildirib və sənəd istəyib. Bu zaman tərəflər arasında mübahisə yaranıb. Polis əməkdaşı sürücünü yerə yıxaraq döyüb.

Sürücü Daxili İşlər Nazirliyinin 102 xidmətinə zəng etmək istəyərkən polis əməkdaşı onun mobil telefonunu əlindən alaraq yerə çırpıb və sındırıb. Sürücü polis əməkdaşından hansı əsasla onu saxladığını, yol polisi ola-ola onun sürücünü nədən saxlatdırdığını soruşduqda polis əməkdaşı tələb edib ki, “gedək postda səni başa salacam”. Bundan sonra onlar Müşfiq postuna gəliblər.

Məlumata görə, həmin polis əməkdaşının adı Nəsimidir. Baş leytenant rütbəsində olan Nəsimi Binəqədi rayon Polis İdarəsinin əməkdaşıdır.

1news.az