Xəbərlər

Azərbaycan Beynəlxalq "Turizm və Səyahətlər" (AITF-2016) sərgisi çərçivəsində baş tutan təqdimatda İndoneziyanın vitse prezidentinin turizm və iqtisadiyyat üzrə xüsusi nümayəndəsi Muchammad Zulkarnain, bu ölkənin turizm şirkətlərinin nümayəndələri iştirak ediblər.

 

İndoneziyanın Azərbaycandakı səfiri Husnan bay Fananie ölkəsinin bu tədbirə böyük maraq göstərdiyini deyib. Onun sözlərinə görə, İndoneziya prezidenti və vitse-prezidenti AİTF sərgisini dəstəklədiyi üçün bura xüsusi nümayəndə heyəti göndərib.

 

Səfir əlavə edib ki, İndoneziyada 17 min 500 ada var, bu ölkənin turistlər üçün maraq kəsb edən adası yalnız Balidən ibarət deyil:

 

“Öz flora və faunasına, sualtı turizminə, ecazkar təbiətinə görə İndoneziya digər ölkələrdən fərqlənir. İndoneziyalılar hər bir qonağı gülərüzlə, mehribanlıqla qarşılayıb, gülərüzlə də yola salırlar. Ümid edirəm ki, iki ölkənin turizm şirkətlərinin görüşlərindən sonra birgə işlər görmək mümkün olacaq”.

 

İndoneziyanın vitse-prezidentinin turizm və iqtisadiyyat üzrə xüsusi nümayəndəsi Muchammad Zulkarnain isə bildirib ki, səfərlərində əsas məqsəd Azərbaycan turizmi ilə tanış olmaq, İndoneziyanın turizm potensialı barədə məlumat vermək, eyni zamanda turist axınının daha da gücləndirilməsinə nail olmaqdır.

 

Qeyd edək ki, tədbirdə İndoneziyanın turizm potensialına dair video görüntülər də təqdim olunub.