Xəbərlər

Elektrotexnika satışı ilə məşğul olan iri marketlər, xüsusilə də, şəbəkə dükanları hər növ elektrotexnika üzrə satışı bu gün səhər saatlarından dayandırıblar.

 

Səbəb kimi də dolların yenidən sürətlə bahalaşması, “üzən məzənnəyə” keçilməsi olub.

 

Sözügedən şəbəkə dükanlarının “qaynar xətt"ləri də bu faktı təsdiqləyiblər.

 

“Artıq satış dayandırılıb. Satış yoxdur” - deyə, bildirilib.

 

Bundan başqa, “Qafqazinfo” xəbər verir ki, kəskin devalvasiya ilə əlaqədar Azərbaycanda bütün ödəmə sistemləri dayandırılıb. 

 

Banklarda müştərilər kreditlərini ödəyə bilmirlər. Şirkətlər dollarla bağlı qərarın bazarda tətbiqini gözləyirlər.

 

Hazırda valyuta dəyişmə məntəqələrində də dollar satışı dayandırılıb.

 

Milli.az-ın verdiyi xəbərə əsasən isə, Bakıda bir sıra ticarət müəssisələrində xarici ölkələrdən Azərbaycana gətirilən məhsulların satışı dayandırılıb.

 

Bu gün səhər Mərkəzi Bankın qərarı ilə manatın məzənnəsinin kəskin dəyişməsindən sonra artıq dərman depoları apteklərə dərmanların verilməsini dayandırıb.

 

Bir sıra mağazalar və supermarketlər də ölkəyə xaricdən gətirilən məhsulların satışını müvəqqəti saxlayıb. Satışın qiymətlər yeni məzənnəyə uyğunlaşdırılandan sonra yenidən bərpa ediləcəyi bildirilir.

 

Kamil Həmzəoğlu