Xəbərlər

Teatrdan verilən məlumata əsasən, baxışdan sonra teatrın bədii şura üzvləri və tamaşanın yaradıcı heyəti yeni tamaşanı müzakirə edərək, bəzi düzəlişlər olmaqla tamaşanın qəbul edilməsi barədə qərar qəbul edilib.

Beləliklə, məşqlərinə ötən ay start verilmiş yeni səhnə əsəri sabah – dekabrın 17-də saat 19.00-da nümayiş etdiriləcək.

“Anamın kitabı” ədəbi müsabiqəsinin qalibi, gənc yazar Sevinc Elsevərin “Ürəyində arzu tut” pyesi əsasında hazırlanmış “Arzu və Murad” adlı tamaşanın quruluşçu rejissoru Gülnar Hacıyeva, bədii rəhbəri, teatrın baş rejissoru, Bəhram Osmanovdur.

Yeni səhnə əsərində əsas obrazları əməkdar artist Gülər Nəbiyeva, aktyorlar  Roza İbadova, Səbinə Məmmədova, Güşvər Şərifova, Nuriyə Əliyeva, Anar Seyfullayev, Eşqin Quliyev, Vüsal Mehrəliyev, Kərəm Hadızadə, Elşən Şıxəliyev, İlham Əsədov ifa edəcəklər.

Xocalı faciəsi baş verən zaman əsir düşmüş gənc qızın acı taleyi, qaçqınlıq şəraitində yaşayan insanların saf  hisləri, psixoloji və mənəvi durumu yeni səhnə əsərinin əsas ideyasını təşkil edir. 

Məlumat üçün bildirək ki, əsər ötən il Azərbaycan Milli Elmlər Akademiyasının Ədəbiyyat  İnstitutu, Azərbaycan Dövlət Gənc Tamaşaçılar Teatrı və “Hədəf” Nəşrlər Evinin birgə təşkilatçılığı ilə “Anamın kitabı” adlı gənc yazarların pyes müsabiqəsində qalib olub.