Xəbərlər

Bu gün əvəzolunmaz sənətkar, korifey müğənni Rəşid Behbudovun doğum günüdür.

ERtv.Az xəbər verir ki, görkəmli müğənni, ictimai xadim əslən Şuşadan olan Rəşid Behbudov 1915-ci il dekabrın 14-də Tiflisdə, vaxtilə bütün şərqdə tanınan xanəndə Məcid Behbudovun ailəsində dünyaya gəlib.

İfaçılığa 1930-cu ildən Tiflisdə başlayan korifey Azərbaycan Dövlət Filarmoniyasının, Opera və Balet teatrının solisti, dövlət konsert ansamblının təşkilatçısı və rəhbəri olub.

1966-cı ildə isə o, musiqi və estrada sənətinin balet, pantomima kimi müxtəlif janrlarını özündə birləşdirən mahnı teatrını təşkil edərək, oranın solisti və bədii rəhbəri olub. Səhnədə olduğu 55 il ərzində Rəşid Behbudov dünyanın 100-dən çox ölkəsinə səfər edib.

Dövrünün Stalin, Mao Dze Dun, Cavaxrlal Neru, İndira Qandi, Suleyman Dəmirəl, Brejnev kimi məşhur siyasi-ictimai xadimləri Rəşid Behbudovun səsini dinləmək üçün onun konsertlərinə gəlib. Korifey həm də milli kinomuzda yaratdığı bənzərsiz rollarla da yadda qalıb.

Qeyd edək ki, Rəşid Behbudov 1989-cu il iyunun 9-da Moskva şəhərində vəfat edib.