Xəbərlər

AZƏRTAC xəbər verir ki, Sərəncamda 2016-cı ilin aprel ayında Əməkdar İncəsənət Xadimi Qəmbər Hüseynlinin anadan olmasının 100 illiyinin tamam olması diqqətə çatdırılıb.

Bildirilib ki, Qəmbər Hüseynli qısa ömrü ərzində milli musiqi sənəti salnaməsinə yeni səhifələr yazmış sənətkardır.

 Azərbaycanın çoxəsrlik mədəni irsinin təbliğində onun xalq musiqisi zəminində təşəkkül tapmış və dərin lirizmi ilə səciyyələnən yaradıcılığının özünəməxsus yeri vardır. 

Bəstəkarın “Cücələrim” əsəri bu gün də dünyada sevilə-sevilə dinlənilən uşaq mahnılarındandır.

Sərəncamda milli mədəniyyətimizin zənginləşdirilməsi və tanıdılması işinə sanballı töhfələr vermiş Qəmbər Hüseynlinin 100 illiyinin keçirilməsini təmin etmək məqsədilə Mədəniyyət və Turizm Nazirliyinə Təhsil Nazirliyi ilə birlikdə, Azərbaycan Bəstəkarlar İttifaqının təkliflərini nəzərə almaqla, bəstəkarın yubileyinə həsr olunmuş tədbirlər planını hazırlayıb həyata keçirmək tapşırılıb.