Xəbərlər

Azərbaycan Tələbələr Birliyi (ATB) Prezident İlham Əliyevin “Doktorantlara, ali təhsil, orta ixtisas və ilk peşə-ixtisas təhsili müəssisələrinin tələbələrinə və şagirdlərinə verilən təqaüdlərin artırılması haqqında” Sərəncamını yüksək qiymətləndirir.

 

ATB-dən Gün.Az-a daxil olan açıqlamada bu sərəncamın ölkədə tələbələrin ali və orta-ixtisas təhsil müəssisələrində motivasiyalarının yüksəlməsinə və onların peşəkar kadr kimi yetişməsinə çox böyük kömək olacağı qeyd edilib. 

 

Birliyin sədri Elvin Aslanov da sərəncamla bağlı öz fikirlərini bildirib:

 

“Artıq heç bir kəsə sirr deyil ki, bütün dünyanı iqtisadi böhran bürüyüb. Neft qiymətləri kəskin azalır. Təbiidir ki, bu da bizim iqtisadiyyatımıza təsir edir. Bunu cənab Prezident də öz çıxışlarında qeyd edir.

 

Amma, bütün bunlara baxmayaq cənab Prezident dünən imzaladığı sərəncamla ölkəmizdə bütün tələbələrə ürəkdən inandığını və ölkəmizin gələcəyinin onlarla bağlı olduğunu göstərdi.

 

Sərəncamın dövlət sifarişi ilə, dövlət hesabına və ödənişli əsaslarla təhsil almalarından asılı olmayaraq bütün tələbələri əhatə etməsi bizə onu deməyə əsas verir ki, bu Azərbaycan ali və orta-ixtisas təhsil sistemində yeni bir mərhələnin başladığının təzahürüdür.

 

Cənab Prezidentin bu məqamda tələbələri düşünməsi və belə bir qərar qəbul etməsi, təbiidir ki, biz tələbələrin qarşısında da ciddi vəzifələr qoyur. Ən əsası ölkəmizin gələcəyinə yararlı kadr kimi yetişmək üçün öz təhsilimiz və şəxsi inkişafımız üzərində ciddi çalışmalıyıq.

 

Unutmamalıyıq ki, bizim əsas vəzifələrimizdən biri də dövlətçiliyimizi qorumaq və Azərbaycanın inkişafı üçün səylərimizi əsirgəməməkdir.

 

Mən həm Azərbaycan Tələbələr Birliyi adından, həmçinin, ali və orta-ixtisas təhsil müəssisələrində təhsil alan yüz minlərlə tələbə adından cənab Prezidentə təşəkkür edir və əmin etmək istəyirəm ki, tələbələr onlara göstərilən etimadı doğrultmaq üçün əllərindən gələni edəcəklər”.