Xəbərlər

Diaspor Jurnalistləri Birliyindən (DJB) Gün.Az-a verilən məlumata görə, DJB-nin təşəbbüsü ilə bir neçə QHT Hollandiyanın Azad Amsterdam Universitetinə etiraz bəyanatı göndərib.

Xatırladaq ki, erməni diasporu noyabrın 7-də Niderlandın Azad Amsterdam Universitetində qondarma Dağlıq Qarabağ Respublikasına həsr olunmuş “Tanınmamış ölkələr, problemin həlli nədir?” mövzusunda seminar keçirəcək. Tədbirə separatçı rejimin “millət vəkili” Armen Sarkisyan və Niderland Krallığının deputatı Harry van Bommel də dəvətlidir.

Bəyanatda qondarma Dağlıq Qarabağ Respublikası ilə bağlı belə bir tədbirin keçirilməsinin yolverilməz olduğu bildirilir:

“Qondarma rejim dünyanın heç bir ölkəsi, hətta Ermənistan tərəfindən tanınmayıb. Dağlıq Qarabağ Azərbaycan dövlətinin tərkib hissəsidir və hazırda Ermənistanın işğalı altındadır”.

Sənəddə Azərbaycan QHT-ləri Azad Amsterdam Universitetini haqqın, ədalətin yanında olmağa səsləyir, erməni lobbisini belə bir tədbirin keçirməsinə icazə verməməyə çağırırlar.

Daha bir bəyanat seminarda iştirak edəcək Niderland Krallığının deputatı Harry van Bommelə və onun təmsil etdiyi Sosialistlər Partiyasına göndərilib. Bəyanatda Harry van Bommelin belə bir tədbirdə iştirak etməsi Azərbaycanın müstəqilliyinə qarşı atılmış təxribatçı addım kimi dəyərləndirilir:

“Siz “Tanınmamış ölkələr, problemin həlli nədir?” mövzusunda seminara qatılmaqla Ermənistan tərəfindən Azərbaycanın ərazi bütövlüyünə qarşı edilən bu təcavüzə önəm vermiş olursuz. Sizi bu tədbirə qatılmamağa səsləyirik. İnanırıq ki, haqqın, ədalətin yanında olacaqsız və erməni lobbisinin təxribatçı tədbirində iştirak etməyəksiz”.

Hər iki bəyanata ermənilərin azərbaycanlılara qarşı törətdikləri terror əməlləri ilə bağlı rəsmi sənəd və linklər əlavə olunub.