Xəbərlər

Gün.Az xəbər verir ki, bu barədə Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin (RSXM) direktoruQurban Yetirmişli mətbuat konfransında jurnalistlərin suallarını cavablandırarkən məlumat verib.

Q.Yetirmişli sentyabrın 4-ü Şəkidə baş verən zəlzələnin güclü olduğunu bildirərək, prosesin ocaqda birdən-birdə sönməyəcəyini söyləyib:

“16 km dərinliklə sol tərəfli yerdəyişmə, qırılıb qalxma baş verib. Böyük sıxılma nəticəsində yerdəyişmə olub. Bu zəlzələdən sonra 50-dən çox təkan baş verib. Ancaq həmin zonada 7 bal və yuxarı gücdə zəlzələ baş verməsi ehtimalı sıfıra bərabərdir. Orada güclü enerji ayrılması artıq baş verib. Əhali qorxmasın”.

RSXM direktoru bununla belə, həmin zəlzələnin digər zəlzələ ocaqlarını oyatmaq ehtimalının olduğunu deyib. O bildirib ki, Şamaxı-İsmayıllı zonası ən aktiv zonadır və ən çox təkanlar da bu zonada olur:

“Bu zona yüksək aktivliyə malikdir. Bu zonada tarixən faciəli zəlzələlər olub. Ancaq bu sahədə dəqiq proqnoz vermək mümkün deyil, əhalini də yersiz təlaşa salmağa ehtiyac yoxdur”.

Bakıda da güclü zəlzələ ocaqlarının olduğunu deyən Qurban Yetirmişli sözlərinə əlavə edib ki, paytaxtda 8-9 ballıq ərazilər var. Amma yeraltı təkanlarla bağlı qısamüddətli proqnozlar vermək mümkün deyil.