Xəbərlər

Festivalda Azərbaycanla yanaşı, Türkiyə, İran və Özbəkistandan məhşur ritm ifaçıları iştirak edir.

Bildirək ki, festival çərçivəsində “Yuxarı Karvansaray” mehmanxana kompleksinin həyətində “Natiq ritm” qrupunun rəhbəri, əməkdar artist Natiq Şirinov musiqisevərlərə nağara alətindən ustad dərsi keçib.

Əvvəlcə tamaşaçılara qrupun fəaliyyəti barədə qısa məlumat verilib. Diqqətə çatdırılıb ki, qrup 2001-ci ildə yaradılıb.

“Natiq ritm” qrupu indiyədək dünyanın bir sıra ölkələrində keçirilən festival və tədbirlərdə, konsertlərdə iştirak edib, tamaşaçı rəğbəti qazanıb.

Ustad dərsində Natiq Şirinov musiqisevərlərə Azərbaycanın qədim zərb alətlərindən olan nağaranın yaranma tarixindən danışıb. Bildirilib ki, araşdırmalara görə, ilk nağara eramızdan 40 min əvvəl yaranıb. İlk vaxtlar nağara saxsıdan hazırlanırmış. Sonralar təkmilləşdirilərək indiki formasını alıb.

Sonra Natiq Şirinov nağarada etdiyi yeniliklər, milli ritmlərimiz barədə məlumat verib, qrupun digər üzvlərinin müşayiəti ilə müxtəlif ritmlər ifa edib, iştirakçıların suallarını cavablandırıb.

Qeyd edək ki, festival Azərbaycan Respublikası Mədəniyyət və Turizm Nazirliyi, Şəki şəhər İcra Hakimiyyətinin təşkilatçılığı ilə keçirilir.