Xəbərlər

Niyazi Zülfüqar oğlu Tağızadə – Hacıbəyov 1912-ci ildə 20 avqustda Tbilisi şəhərində dövrünün tanınmış bəstəkarı Zülfüqar Hacıbəyovun ailəsində anadan olub. İlk təhsilini Bakı Musiqi Texnikumunda alıb. Lakin sonra təhsilini davam etdirmək üçün Moskva və Leninqrada (indiki Sankt-Peterburq - red) şəhərlərinə gedib.

İdmanı sevib və bilavasitə onunla məşğul olmuş Niyazi 1946-60-cı illərdə Azərbaycanın Ağır Atletika Federasiyasına rəhbərlik edib.

Lakin geniş istedad sahibi Niyazi sənətsevərlərin yaddaşında görkəmli rejissor və bəstəkar kimi yer tutub. “Xosrov və Şirin” operasının, “Zaqatala süitası”, “Qaytağı”, “Konsert valsı” simfonik əsərlərinin və s. əsərlərin müəllifi olan Niyazi həm də Hindistan yazıçısı Rabindranat Taqorun əsərləri əsasında “Çitra” baletini (1962) yaradıb.

Niyazi, Zülfüqar Hacıbəylinin “Aşıq Qərib”, Üzeyir Hacıbəylinin “Arşın mal alan” və s. əsərlərinin yeni redaksiyalarını hazırlayıb, Azərbaycan xalq mahnılarını simfonik orkestr üçün işləyib, 1935-ci ildə “Rast” və “Şur” muğamlarını nota salıb.

1951 – 1952-ci illərdə Azərbaycan Dövlət Akademik Opera və Balet Teatrının dirijoru işləmiş Niyazi 1951 və 1952-ci illərdə SSRİ Dövlət mükafatına layiq görülüb.
 

Niyazi 1984-cü il avqustun 2-də Bakıda vəfat edib.