Xəbərlər

Xatirə mərasimi Sülh parkında yerli vaxtla saat 8:15-də - Hirosima şəhəri üzərində atom bombasının partladığı an bir dəqiqəlik sükutla başlayıb.  

Hirosimanın meri Kazumi Matsui öz bəyanatında ABŞ Prezidentini bu şəhəri ziyarət etməyə dəvət edib.

“Hirosimaya gəlin və faciənin canlı şahidlərini dinləyin”.

O, xatırladıb ki, atom bombardmanı nəticəsində yalnız yerli sakinlər deyil, eyni zamanda, Koreya yarımadasının, Çinin, bütün Asiya regionunun sakinləri, həmçinin amerikalı hərbi əsirlər də həlak olublar.

Düz 70 il bundan əvvəl ABŞ-ın B-29 Enola Gay bombardmançı təyyarəsi bu şəhərə “Balaca” adlı atom bombasını atıb. Partlayış nəticəsində təqribən 140 min nəfər həlak olub.

1945ci il avqustun 6 və 9-u ABŞ hərbi təyyarəçiləri Yaponiyanın Hirosima və Naqasaki şəhərlərinə atom bombası atıblar. Partlayış nəticəsində Hirosimanın 350 min sakinindən 140 mini, Naqasakidə isə 74 min insan həlak olub.