Beynəlxalq Avrasiya Mətbuat Fondu və Misir Mədəniyyət Mərkəzi əməkdaşlığı müzakirə edib
11 iyun, 2015 15:12
Ertv.Az-a Mərkəzdən verilən məlumata görə, görüş əməkdaşlıq və tanışlıq xarakteri daşıyıb.
Misir Mədəniyyət Mərkəzinin müdiri Ahmed Sami Elaydi qonaqlara Mərkəzin Azərbaycandakı fəaliyyətindən, ilk və yeganə ərəb mərkəzi olmasından, iki ölkə arasında mədəni əlaqələrin genişlənməsi üçün aparılan işlərdən danışıb.
Beynəlxalq Avrasiya Mətbuat Fondunun sədri Umud Mirzəyev dəvətə və Misir Mədəniyyət Mərkəzi ilə tanış olmaq üçün yaradılan şəraitə görə öz təşəkkürünü bildirib.
Söhbət zamanı ərəb ölkələri ilə əməkdaşlığın vacibliyi, bu sahədə müştərək işlərin görülməsi, Azərbaycandakı ərəb səfirlikləri ilə birgə görüşlərin təşkili, o cümlədən mətbuat nümayəndələrinin qarşılıqlı səfərlərinin həyata keçirilməsinin əhəmiyyəti vurğulanıb.
Eyni zamanda Azərbaycan həqiqətlərini əks etdirən məlumatların, nəşrlərin ərəb dilinə tərcümə olunaraq ərəb dünyasına çatdırılması və bir sıra təkliflər müzakirə olunub.