Xəbərlər

Ertv.Az Energetika Nazirliyinə istinadən xəbər verir ki, bu barədə Nazirlikdə İndoneziyanın energetika  və mineral sərvətlər naziri Sudirman Səidin rəhbərlik etdiyi nümayəndə heyəti  ilə görüşdə Azərbaycanın energetika naziri Natiq Əliyev bildirib.

 

Nazir qeyd edib ki, İndoneziya ilə siyasi, iqtisadi sahələrdə ikitərəfli əlaqələrin inkişafı   qənaətbəxş  səviyyədədir və münasibətlərin daha da dərinləşməsi üçün geniş imkanlar var. O bildirib ki, Azərbaycanla İndoneziya arasında ticarət dövriyyəsinin həcmi 3,4 mlrd. dollardır:

 

“Ötən il Azərbaycanda istehsal olunan xam neft və neft məhsullarının 2 milyon tonu İndoneziyaya ixrac olunub”. Nazir diqqətə çatdırıb ki, Azərbaycanın neft emalı, kəşfiyyat işlərində böyük təcrübəsi var və İndoneziya bu təcrübədən bəhrələnə bilər.

 

N.Əliyev bu ilin sentyabrında  “Əsrin müqaviləsi”nin növbəti ildönümü ilə bağlı keçiriləcək tədbirə ölkələrimiz arasında enerji sahəsində nəzərdə tutulan planların müzakirəsi məqsədilə indoneziyalı naziri də dəvət edib. 

 

Görüşdə indoneziyalı nazir də Azərbaycanla İndoneziya arasındakı münasibətlərin inkişafından danışıb. O, Azərbaycanın enerji resurslarından istifadə ilə bağlı ölkəsinin maraqlarından, bu sahədə rəsmi Bakı ilə birbaşa əlaqələrin yaradılmasının önəmindən bəhs edib. 

 

Onun sözlərinə görə, İndoneziyada neft hasil edilsə də, hasilatın həcmi ölkənin daxili ehtiyaclarını ödəmək gücündə deyil: “Ona görə də İndoneziya enerji təhlükəsizliyini təmin etmək məqsədilə  digər neft və qaz istehsalçısı olan ölkələrlə birbaşa əlaqələrin yaradılmasına üstünlük verir. Azərbaycan da bu istiqamətdə mühüm ölkələrdən biridir”.

 

Sonda Birgə Bəyannamə imzalanıb.