Xəbərlər

Adme.ru saytına istinadən xəbər verir ki, Polşanın Bıdqoş şəhərində heyvanlar üçün sığınacaq-bəsləmə məntəqəsindəki Rademenes adlı qara pişik digər heyvanlara əsl ana şəfqəti göstərir.

 

Rademenes heyvanlar üçün sığınacaqda peyda olanda cəmi 2 aylıq imiş. Məntəqənin baytarları ona yuxarı tənəffüs yollarının iltihabı diaqnozunu qoyublar.

 

Pişiyin vəziyyəti həddindən artıq ağır olsa da, o, inadla həyatı uğrunda mübarizə aparıb və nəticədə sağlamlığına qovuşmağa nail olub.

 

Sağalandan sonra bu qara pişik sığınacaq evinin digər sakinlərinin qayğısına qalmağa başlayıb. Həm də onların pişik və ya it olmasının fərqinə varmadan...

 

Baytarların sözlərinə görə, sığınacaqda yeni xəstə heyvanlar peyda olan kimi, Rademenes onlara yaxınlaşaraq qucaqlamağa, isitməyə çalışır, hətta bəzən onların qulaqlarını yalayır.

 

Bu qara pişik sözügedən heyvanlar üçün sığınacaq-məntəqənin əsl talismanına çevrilib. Onun necə böyük məhəbbətlə digər xəstə heyvanları qucaqladığını əsk etdirən fotolara baxanda düşündüm ki, “heyvanlar şüursuzdur”, “heyvan kimi adamdır, nə elədiyini bilmir” və s. bu kimi gündəlik həyatımızda işlətdiyimiz ifadələri bir daha dilimizə gətirmərik yəqin...