Xəbərlər

“Vatan” qəzetinə istinadən xəbər verir ki, Qarsın Sarıkamış qəsəbəsindən 36 kilometr aralıda yerləşən, 150 ev və 1 100 nəfər əhalidən ibarət olan Beşyol kəndində içməli su problemi dözülməz həddə çatdığından, qonşu kəndlərin sakinləri qızlarını ora gəlin köçürməkdən imtina edirlər.

 

Kənd sakini, 4 uşaq atası Beşyol əhalisinin həqiqətən, içməli suya həsrət qaldıqlarını  deyib: “Məscidimiz var, amma su olmadığından, imam çıxıb getdi. Gənclərimiz evlənə bilmirlər. Su olmadığı üçün oğlanlarımıza qız vermirlər.

 

Məktəbimizdə 11 müəllim var. Onlar da susuzluqdan qaçıb getməsinlər deyə, müəllimlərə bidonlarla su daşıyırıq.

 

Çimməyə də su tapa bilmirik. Heyvanları qarı əritməklə suvarırıq. Seçkilər vaxtı səsimizi alıb vədlər verənlər də bizi unudublar. Əgər su problemi həll olunmasa, yəqin ki əhali kənddən köç etməli olacaq”.