Xəbərlər

Bu gün AFFA-nın İcraiyyə Komitəsinin iclasında yığmamızın baş məşqçi postuna təsdiqlənən xorvatiyalı mütəxəssis Robert Prosineçki media nümayəndələrinin suallarını cavablandırıb.

 

O bildirib ki, ölkəmizə gəldiyi gündən Bakıdan, Azərbaycandan və futbolumuzdan razıdır:

 

“Gördüyüm oyunçular məni qane edir. Əlimdən gələni edəcəyəm ki, Azərbaycan futbolu irəli getsin. AFFA-nın prezidenti Rövnəq Abdullayevə də dedim ki, burada yaşayacam, ailəm Bakıda qalacaq. Bu, mənə çox kömək edəcək. Mətbuatla da əlaqəm yaxşı olacaq”.

 

Azərbaycanlı futbolçular haqqında danışan Prosineçki bildirib ki, burada istedadlı futbolçular var:

 

“Burada istedadlı futbolçular var, amma onların adlarını açıqlamaq istəmirəm. Sadəcə, onu deyə bilərəm ki, istedadlı futbolçu az deyil. İlk növbədə, “Neftçi” və “Qarabağ” klublarında elə oyunçular var ki, onlar milliyə kömək edə bilərlər.

 

Vaxt gələcək ad çəkəcəyəm, amma bunu indi demək istəmirəm. Azərbaycanda futbolçu potensialı var”.

 

Prosineçki sonda gənc futbolçular haqqında danışıb:

 

“Hər futbolçunun millidə oynamaq imkanı var, eləcə də təcrübəlilərin. Hamısı ilə söhbət edəcəyəm. Təbii ki, millidə yeni adlar olacaq. Amma bu, o demək deyil ki, təcrübəlilərdən imtina edəcəyik. Futbolçulardan çox şey asılıdır, onlar özlərinə inanmalıdırlar”.