Xəbərlər

İstinadən xəbər verir ki, pavilyonda 16 şirkət- “Cybernetica” “Aktors”, “Trump Consulting”, Estoniya-Azərbaycan Ticarət Palatası, “Real Systems”, “Defendec” və s. müxtəlif innovativ İKT məhsullarını nümayiş etdirəcək.

Sərginin ziyarətçiləri Azərbaycanın mobil elektron imza xidməti olan “Asan imza” ilə Estoniyada tətbiq olunan analoji “Mobiil ID” xidmətinin müqayisəli statistik təhlili ilə tanış olacaqlar. Bundan başqa, Estoniya pavilyonunda gələcəyin texnologiyası olan VLC (visible light communication) – işıq şüaları ilə ötürülən mobil internet- eston-yapon birgə texnologiyasının nümayişi də təşkil ediləcək. Ziyarətçilərə VLC texnologiyası ilə kütləvi tədbirlər zamanı məlumatların yüksək sürətlə ötürülməsinin necə baş verdiyi göstəriləcək.

Estoniya pavilyonunda işıq diodu və kommersiya baxımından təkmilləşdirilmiş “LTE-Advanced” texnologiyası və onlayn bankçılıq sahəsində yeni texnoloji həllər də təqdim olunacaq. Bundan başqa, Estoniyanın “Rakvere” Ağıllı Ev və Mühəndislik Mərkəzi tərəfindən işlənib hazırlanmış və elektrik enerjisi sərf etmədən işləyən texnoloji nailiyyətlər də nümayiş etdiriləcək.

“Bakutel-2014” XX Azərbaycan Beynəlxalq telekommunikasiya və informasiya texnologiyaları sərgisi dekabrın 2-dən 5-dək Bakı Sərgi Mərkəzində keçiriləcək.