Xəbərlər

Azərbaycan millisinin aparıcı üzvlərindən dördü irəliləsə də, altısı geriləyib.

Komandamızın heyətində “Böyük Dəbilqə”də gümüş medal qazanan Tərlan Kərimov (66 kq) birdən-birə 52 rəqibini arxada qoyaraq, 35-ci yerə yüksəlib. Həmin turnirin qalibi olan Orxan Səfərov, bürünc mükafatçıları İlqar Müşkiyevlə (60 kq) Rüstəm Orucov (73 kq) da irəliləyənlər sırasındadı. Orxan 5-ci (+2), digərləri 11-ci (+1; +4) pilləyə qalxıblar.

Dünya çempionu Elxan Məmmədov (100 kq) mövqeyini qoruyub. O, yenə 4-cü yerdədi.

Son yarışlarda lazımı nəticəni göstərə bilməyən Nicat Şıxəlizadə (66 kq), Məhəmmədəli Mehdiyev, Tural Səfquliyev (hər ikisi 81 kq), Şahin Qəhrəmanov (90 kq), Elmar Qasımov (100 kq) və Kifayət Qasımova (57 kq) isə geriləyiblər. Onlar müvafiq olaraq, 11-ci (-1), 49-cu (-1), 63-cü (-1), 27-ci (-2), 6-cı (-1) və 24-cü (-1) yerə eniblər.

Qeyd edək ki, cüdo idman növündə Olimpiadaya lisenziya reytinq xalına əsasən verilir.