Xəbərlər

Aİ nümayəndəliyindən verilən məlumata görə, festival 30 oktyabrda başlayacaq və quruma üzv olan 16 ölkədən müasir filmlər təqdim edəcək.

Festival çərçivəsində Avstriya, Belçika, Bolqarıstan, Xorvatiya, Çex Respublikası, Estoniya, Finlandiya, Fransa, Almaniya, Macarıstan, İtaliya, Latviya, Rumıniya, İspaniya, İsveç və Birləşmiş Krallığın filmləri və Azərbaycanın 16 filmi nümayiş olunacaq.

Xorvatiya filmi olan "Sirli oğlan" və Finlandiya animasiya filmi "Niko 2 – kiçik qardaş – böyük narahatlıq", xüsusilə uşaq və yeniyetmələr üçün nəzərdə tutulub.

"Avropanın müxtəlifliyinə və onun zəngin mədəniyyətinə əsaslandığı baxımdan Avropa Film Festivalı təkrarolunmazdır. Festival mədəniyyət müxtəlifliyinin verdiyi bir çox faydaları öyrənmək üçün bizə imkan verir. Mədəniyyət bir çox yollarla insanların ümid və arzularını təcəssüm edib, onları bir araya gətirir", - festival ərfəsində Aİ səfiri Malena Mard deyib.

Hər bir film həftəarası iki sessiya (16.00 və 18.00), həftə sonunda isə bir sessiya ilə nümayiş etdiriləcək. Giriş pulsuzdur və biletlər tələb olunmur. Festivalın məkanı Neftçilər prospekti ünvanında "Park Bulvar"da yerləşən "Park Cinemadır".

Avropa Film Festivalı Aİ-nın Azərbaycandakı nümayəndəliyi tərəfindən 2010-cu ildən təşkil olunaraq, Avropa İttifaqı ölkələri ilə Azərbaycan arasında qarşılıqlı anlaşmaya töhfə edir, onlar arasında mədəni əlaqələrin qurulması və daha da inkişaf etdirilməsi məqsədini güdür.