Xəbərlər

Oya Ergün Bakıda olmağından məmnunluğunu dilə gətirib, ölkəmizdəki pərəstişkarlarından xeyli məktublar aldığını qeyd edib. Musiqinin insanları bir-birinə yaxınlaşdırdığını deyən məşhur ifaçı Azərbaycanda belə bir incəsənət bayramının təşkilinin onu sevindirdiyini xüsusilə vurğulayıb.

Türkiyənin Azərbaycandakı səfirliyinə konsertin ərsəyə gəlməsinə görə minnətdarlığını bildirən Oya Ergün öz ifası ilə dünyaya səs salan əsərlərini Azərbaycan tamaşaçılarına təqdim edib.

Musiqi axşamında tanınmış ifaçını Türkiyənin məşhur caz ustası Evrim Demirel Ensemble, kamançada Munis Şərifov müşayiət edib.

“Bu konserti çoxdan gözləyirdim. Hisslərimi sözlə ifadə edə bilmirəm. Burada çıxış etmək böyük məsuliyyət tələb edir. Ümidvaram ki, konsertə gələn insanlar da bizim hazırladığımız proqramdan çox məmnun qalacaqlar”, - deyə, Oya Ergün bildirib.

Oya Ergün və Evrim Demirel Ansamblı Amsterdam Konservatoriyasında birlikdə təhsil alıblar. E. Demirel, eyni zamanda, bəstəkar kimi də fəaliyyət göstərir. Demirel yorulmadan qastrol səfərlərinə çıxaraq musiqisini dünyanın, demək olar ki, hər bir guşəsində tanıdıb.