Xəbərlər

ATƏT-in Minsk Qrupunun həmsədrləri Nyu-Yorkda Azərbaycan və Ermənistan XİN rəhbərləri Elmar Məmmədyarov və Edvard Nalbandyanla görüşərək prezidentlərin oktyabrın sonuna Parisdə planlaşdırılan görüşünə hazırlığı müzakirə ediblər.

ERtv xəbər verir ki, bu barədə ATƏT-in rəsmi saytında məlumat yayılıb.

Məlumatda deyilir ki, görüşdə Ceyms Uorlik (ABŞ), İqor Popov (Rusiya), Pyer Andrie (Fransa)  və ATƏT-in fəaliyyətdə olan sədrinin şəxsi nümayəndəsi Anjey Kasprşik iştirak edib.

Görüşdə Azərbaycan və Ermənistan prezidentləri Dağlıq Qarabağ münaqişəsinin nizamlanmasının əsas elementləri üzrə dialoqu davam etdirməyi planlaşdırırlar. Həmsədrlər münaqişənin nizamlanması yolunda tərəqqiyə irəliləyişə nail olmaq üçün dövlət başçılarının məhsuldar müzakirələr aparacaqlarına ümid etdiklərini vurğulayıblar.

Pyer Andrie nəzərdə tutulan görüşün gündəliyə salınacaq məsələləri barədə iştirakçıları qısa məlumat verib. Həmsədrlər yaxın zamanda bölgəyə səfər etmək niyyətində olduqlarını bildiriblər.

Həmsədrlər həmçinin ATƏT-in fəaliyyətdə olan sədri sədri Didye Burkhalter ilə görüşərək Dağlıq Qarabağ münaqişəsinin sülh yolu ilə nizamlanma prosesinin inkişafını müzakirə ediblər və ona dövlət başçılarının  Soçi və Uelsdə keçirilmiş son görüşləri barədə hesabat təqdim ediblər. Həmçinin ATƏT sədrinə Paris görüşünə hazırlığa dair məlumat veriblər.