Xəbərlər

Azərbaycanda bu ilin 9 ayı ərzində doğulan uşaqlara qoyulan adlar arasında üstünlük təşkil edən adların siyahısı açıqlanıb.

ERtv xəbər verir ki, Ədliyyə Nazirliyindən APA-ya verilən məlumata görə, oğlan adları arasında ən çox populyarlıq qazanan ad Yusifdir.

Belə ki, bu ilin 9 ayı ərzində doğulmuş oğlan uşaqlarından 2702 nəfərə Yusif adı verilib. Daha çox qoyulan oğlan adları arasında Əli (1735), Hüseyn (1705), Ömər (1098), Məhəmməd (962), İbrahim (644), Kənan (616), Nihad (609) adları da var.

Qız uşaqlarına verilən ən populyar ad isə Zəhradır. Belə ki, 2412 uşağa Zəhra adı verilib. Populyarlıq qazanan digər qız adları isə - Nuray (1747), Fatimə (1651), Ayan (1200), Aylin (1254), Zeynəb (1145), Xədicə (903), Mədinə (779), Leyla (763), Fidan (742), Gülay (739), Nəzrin (610) adlarıdır.

Zəhra və Yusif adları son beş ildə Azərbaycanda ən çox qoyulan adlar siyahısında birinci yeri tutur. Son beş ildə 15905 uşağa Zəhra, 15819 oğlana isə Yusif adı verilib.

Qeyd edək ki, populyarlıq qazanmayan adlar Süleyman və Səbinə adlarıdır. Belə ki, son beş ildə 1366 uşağa Süleyman, 1363 nəfərə isə Səbinə adı verilib.