Xəbərlər

Avropa İttifaqı (Aİ) Rusiyaya qarşı yeni qadağaların siyahısını açıqlayıb.

Siyahıya Rusiyanın “Rosneft”, “Transneft” və “Qazpromneft” kimi şirkətlərin adları da düşüb.

ERtv BBC-yə istinadən xəbər verir ki, Aİ həmçinin Rusiyanın doqquz müdafiə konserninin ikili təyinatlı məhsullarının tədarükünə qadağa tətbiq edib.

Siyahıya “Sirius”, “Stankoinstrument”, “Ximkompozit”, “Kalaşnikov” konsernləri, Tula silah zavodu, “Texnoloqii maşinostroeniya”, “Vısokotoçnıe kompleksi”, “Almaz-Antey” HHM konserni və “Bazalt” EİB daxil edilib.

Yeni sanksiyalar, həmçinin “Uralvaqonzavod”, “Oboronprom” və Birləşmiş Təyyarəqayırma Korporasiyasına toxunacaq. Onlara borc məqsədi ilə maliyyə vəsaitinin ayrılması qadağan olunub.

Avropa qurumunun qərarı ilə Sberbank, VTB, Qazprombank, VEB və Rosselxozbank üçün nəzərdə tutulan borclar məhdudlaşdırılır.

Bundan əlavə, Avropa şirkətlərinə Rusiya tərəfinə dərinsulu, arktik və şist neftinin kəşfiyyatı və hasilatı üzrə xidmət göstərmələri qadağan olunub.

Fiziki şəxslərin qara siyahısına isə daha 24 soyad əlavə edilib: bura xüsusilə, deputatlar Jirinovski, Vasilyev, Melnikov, Lebedev və Leviçev, “Rostex” korporasiyasnın rəhbəri Sergey Çemezov, həmçinin Ukraynanın şərqindəki separatçıların liderləri - Aleksandr Zaxarçenko, Vladimir Kononov, Miroslav Rudenko, Gennadi Sıplakov, Andrey Pinçuk, Andrey Rodkin, Aleksandr Karaman, Georgi Muradov, Mixail Şeremet daxil olub.

Rusiyanın səhm bazarı yeni qadağalar haqqında elana düşmə ilə reaksiya verib, rubl də həmçinin dollar və avroya nisbətdə aşağı düşüb.