Xəbərlər

Azad Rəhimov Qabriella Battaini–Draqonini ilə “Bakı 2015”-i müzakirə edib.

Gənclər və İdman Nazirliyinin (GİN) mətbuat xidmətindən ERtv-yə verilən məlumata görə, nazir Azad Rəhimov Avropa Şurası Baş katibinin müavini Qabriella Battaini–Draqonini qəbul edib.

Görüş çərçivəsində A.Rəhimov 2015-ci ildə Bakı şəhərində keçiriləcək ilk Avropa Oyunlarına hazırlıq işlərinin gedişi ilə bağlı məlumatlar verib. Nazir, həmçinin Azərbaycanın Avropa Şurasında sədrliyi dövründə həyata keçiriləcək bir sıra tədbirlər haqqında da qonağı məlumatlandırıb.

Bununla yanaşı, 1-5 oktyabr tarixlərdə Qəbələ şəhərində keçiriləcək Avropa Şurasının “Nifrət nitqinə yox” kampaniyasının beynəlxalq forumu və 28-30 oktyabr tarixlərdə Bakı şəhərində keçiriləcək Gənclər siyasəti üzrə Qlobal Gənclər Forumu da qonaqla müzakirə edilib.

2014-cü ilin sentyabr ayında İsveçrənin Makkolin şəhərində keçiriləcək Avropa Şurasının İdmana məsul nazirlərinin növbəti görüşünün mövzuları ətrafında da fikir mübadiləsi aparılıb.