Xəbərlər

Britaniyalı cütlük 16 il davam edən dəniz səyahətindən geri qayıdıb.

ERtv Daily Mirror-a istinadən xəbər verir ki, Uels sakinləri əvvəlcə öz yaxtalarında bir həftəlik məzuniyyət keçirtməyi planlaşdırıblar.

Klayv və Ceyn Qrin qısamüddətli kruizə 1998-ci ildə 35 futluq yaxtada yollanıblar.

Onlar yalnız İspaniyaya getmək niyyətində olublar, lakin dəniz səyahətindən elə valeh olublar ki, məzuniyyətlərini uzatmaq qərarına gəliblər.

Turistlər sonda öz yaxtalarında 51 min dəniz mili qət etmiş olublar, 56 ölkəni gəziblər və yolda pensiya yaşlarına çatıblar.

Cütlük dünya səyahətini maliyyələşdirmək üçün Uelsdəki evlərini kirayə veriblər.

Ər-arvad bir çox gündəlik xərclərdən imtina edib və həftəyə 200 dollar xərcləyiblər.

Bəzən onlar öz şəxsi əşyalarını yeməyə dəyişiblər. 60 yaşlı Ceyn Qrin bir dəfə Fici adalarında olarkən öz büsthalterini yerli qadınla bir kisə meyvəyə dəyişib.

Cütlük 16 il ərzində bir dəfə də olsun mübahisə etməyib. Səfərə qədər Klayv Qrin mühəndis işləyib, Ceyn isə həkim-mikrobioloq.

Qeyri-adi kruiz 16 il, bir ay və iki gün davam edib.