Xəbərlər

“Azərbaycan Hava Yolları - AZAL” aviaşirkəti Bakı - Nyu-York reysi üçün aviabiletlərin satışına başlayıb.

AZAL-dan ERtv-yə verilən məlumata görə, uçuşlar sentyabrın 24-dən etibarən həyata keçiriləcək.

Nyu-York şəhərinin Kennedi Hava Limanına reyslər hər həftə çərşənbə və şənbə günləri yerinə yetiriləcək. Təyyarə Bakıdan yerli vaxtla səhər saat 6-da havaya qalxacaq, Nyu-York vaxtı ilə saat 9.30-da yerə enəcək. Əks istiqamətdə uçuşlar həftənin eyni günlərində saat 11.30-da həyata keçiriləcək.

Təyyarə Bakıda isə növbəti gün saat 08:00-da yerə enəcək.

Aviareyslər uzaqməsafəli istiqamətlərdə uçuşlar üçün nəzərdə tutulmuş müasir “Airbus-A 340” tipli hava gəmiləri ilə yerinə yetiriləcək. Bu hava gəmiləri ən yüksək təhlükəsizlik tələblərinə cavab verir.