Xəbərlər

Azərbaycan və Gürcüstan prezidentləri İlham Əliyev və Georgi Marqvelaşvili arasında telefon danışığı olub.

ERtv Gürcüstan prezidentinin rəsmi saytına istinadən xəbər verir ki, dövlət başçıları ikitərəfli münasibətləri və gələcək perspektivlərini müzakirə ediblər.

Söhbət zamanı həmçinin Azərbaycanda keçirilən futbol oyunu zamanı baş vermiş hadisəyə də toxunulub. Prezidentlər qeyd ediblər ki, bu hadisə iki ölkə arasındakı dostluq əlaqələrinin təsir edə bilməz.

Xatırladaq ki, iyulun 31-də Avropa Liqasının üçüncü təsnifat mərhələsi çərçivəsində Bakının “Neftçi” və Gürcüstanın “Çixura” futbol komandaları arasında keçirilən oyunda Gürcüstandan gəlmiş bəzi azarkeşlər tərəfindən təxribat törədilməsinə cəhd edilib. Onlar oyunun keçirildiyi “Bakcell Arena” stadionunda Azərbaycanın Zaqatala və Qax rayonlarının Gürcüstan ərazisi kimi göstərildiyi xəritə asıblar.

Bu, yerli azarkeşlərin kəskin etirazına səbəb olub, nəticədə qarşıdurma yaranıb. Polis əməkdaşları tərəfindən görülmüş operativ tədbirlər nəticəsində hadisənin kütləvi iğtişaşa çevrilməsinin qarşısı alınıb.