Xəbərlər

ERtv xəbər verir ki, 20-27 iyul 2014-cü il tarixlərində qadınlar arasında WTA seriyalı “Baku Cup-2014” turniri keçiriləcək.

 

Əsas setkada 32 yüksək reytinqli tennisçi mübarizə aparacaq. Onlar arasında 8 iştirakçı seçmə oyunlardan sonra qoşulacaq.

 

Seçmə oyunlar 20 iyulda keçiriləcək. 21 iyuldan isə turnirin əsas mərhələsi start götürəcək.

Qeyd edək ki, WTA Tour-un (Women`s Tennis Association) rəhbərliyi ilə keçirilən “Baku Cup 2014” turnirinin mükafat fondu bu il 250 min ABŞ dollarıdır.

 

2011-ci ildən başlayaraq hər il keçirilən “Baku Cup” turnirləri müddətində Vera Zvonaryova, Anastasiya Pavlyuçenkova, Aravan Rezai, Boyana Yovanovski, Elina Svitolina kimi tennis ulduzları ölkəmizdə tennis oynayıblar.

 

“Baku Cup-2012” turnirinin qalibi Boyana Yovanovski və “Baku Cup-2013” turnirinin qalibi Elina Svitolinanın bu il də turnirdə öz güclərini sınayacaqları gözlənilir.

 

Ölkəmizi isə “Baku Cup-2013” turnirində olduğu kimi gənc tennisçimiz Nəzrin Cəfərova və ilk dəfə olaraq turnirə qoşulacaq Züleyxa Səfərova təmsil edəcəklər.

 

Məlumat üçün bildirək ki, oyunlar Bakı Tennis Akademiyasının (BTA) 4 kortunda keçiriləcək. Final oyunu isə 27 iyul tarixində 3000 tamaşaçı tutumuna malik Mərkəzi Kortda baş tutacaq. Bütün oyunların həm yerli, həm də xarici idman kanallarında canlı olaraq efirə getməsi nəzərdə tutulub.