Xəbərlər

Prezident İlham Əliyev 2014-cü ildə Azərbaycan ədəbiyyatının tanınmış nümayəndəsi, xalq yazıçısı Qılman İlkinin 100 illik yubileyinin keçirilməsi barədə sərəncam imzalayıb.

ERtv AzərTAc-a istinadən verdiyi xəbərə görə, sənəddə bildirilir ki, Qılman İsabala oğlu Musayevin Azərbaycan ədəbiyyatının inkişafında mühüm xidmətlərini nəzərə alaraq xalq yazıçısının 100 illik yubileyinin keçirilməsini təmin etmək məqsədi ilə qərara alıram:

1. Mədəniyyət və Turizm Nazirliyi, Azərbaycan Yazıçılar Birliyinin təkliflərini nəzərə almaqla, xalq yazıçısı Qılman İlkinin 100 illik yubileyinə həsr olunmuş tədbirlər planını hazırlayıb həyata keçirsin.

2. Nazirlər Kabineti bu sərəncamdan irəli gələn məsələləri həll etsin.

Qılman İlkin ədəbiyyat tarixində özünəməxsus mövqeyə malik sənətkarlardan biri kimi uzun illər ərzində çoxcəhətli səmərəli fəaliyyət göstərib və zəngin Azərbaycan nəsrinin realist ənənələri zəminində yaratdığı qiymətli əsərləri ilə milli mədəniyyətin inkişafına töhfələr verib.