Xəbərlər

İyunun 8-də Qahirədə Misir Ərəb Respublikasının yeni seçilmiş Prezidenti Əbdülfəttah əl-Sisinin andiçmə mərasimi keçiriləcək.

Yeni Prezident səlahiyyətli məhkəmə müşavirlərinin və mərasimə dəvət olunmuş xarici qonaqların şahidliyi ilə Ali Konstitusiya Məhkəməsi qarşısında and içəcək.

Dövlət televiziya kanalı təntənəli mərasimin keçiriləcəyi zaldan bu tədbiri bütün dünyaya birbaşa yayımlayacaq. Qahirədə akkreditə olunmuş yerli və xarici jurnalistlər isə bu mərasimi yalnız televizorla izləyə biləcəklər.

Proqrama əsasən təntənəli mərasim başa çatdıqdan sonra prezident korteji Heliopolisə gedəcəkdir. Orada öz vəzifəsinin icrasına rəsmən başlayacaq dövlət başçısı “Əl-İttihadiyyə” prezident sarayında min nəfərdən çox yüksək səviyyəli xarici qonağı qəbul edəcəkdir.

Əbdülfəttah əl-Sisinin andiçmə mərasimi münasibətilə iyunun 8-i Misirdə rəsmən istirahət günü elan edilib.