Xəbərlər

AFFA İntizam Komitəsinin növbəti iclası keçirilib.

ERtv xəbər verir ki, iclasda həvəskarlar arasında keçirilən Azərbaycan birinciliyinin “Binə” – “Çağırğan” oyunu ilə bağlı sərt qərarlar qəbul olunub.

Məlumata görə, 28 may tarixdə baş tutan “Binə”–“Çağırğan” oyununun 113-cü dəqiqəsində Bakı klubunun 55 №-li futbolçusu Tarıverdiyev Cavid rəqibə bilərəkdən başla zərbə endirdiyinə görə qırmızı vərəqə almışdı. 114-cü dəqiqədə “Binə” klubunun azarkeşləri meydana daxil olaraq rəqib komandanın futbolçularına hücum ediblər. Buna cavab olaraq “Çağırğan”ın azarkeşləri də meydana daxil olub və tərəflər arasında insident yaşanıb. Hakim, polis və Azərbaycan Həvəskar Futbol Federasiyası (AHFF) nümayəndələrinin səyi nəticəsində 8 dəqiqəlik məcburi fasilədən sonra oyun bərpa edilib. Oyunsonrası mükafatlandırma mərasimində “Binə”nin bəzi futbolçuları onlara təqdim olunan medalları etiraz əlaməti olaraq azarkeşlərə tərəf atıblar.

Qurumun bu faktlarla bağlı qəbul etdiyi qərarlara görə, “Binə” komandası AHFF-nin keçirdiyi XVI Ölkə Kuboku yarışları və 2014/2015-ci illər mövsümündə keçiriləcək XVII Ölkə birinciliyi və Kuboku yarışlarından kənarlaşdırılıb. Həmçinin “Binə” klubunun baş məşqçisi Məmmədəli Ağatalıbovun növbəti bir il ərzində AFFA-nın bayrağı altında keçirilən bütün yarışlarda məşqçi kimi fəaliyyətinə qadağa qoyulub,

Digər qərara əsasən, Sabirabadın “Çağırğan” komandası AHFF-nin 2014/2015-ci illər mövsümündə keçiriləcək XVII ölkə birinciliyinin 3 təqvim oyununu neytral meydanda boş tribunalar qarşısında keçirəcək.