Xəbərlər

Türkiyənin xarici işlər naziri Əhməd Davudoğlu Azərbaycan, Türkmənistan və Türkiyə xarici işlər nazirlərinin üçtərəfli formatdakı görüşündə iştirak etmək üçün Azərbaycana gəlib.

ERtv xəbər verir ki, bu barədə Türkiyə mətbuatı məlumat yayıb.

XİN rəhbərlərinin üçtərəfli görüşündə enerji və nəqliyyat məsələləri başda olmaqla, üç ölkəni maraqlandıran mövzular üzrə ikitərəfli və regional məsələlər ətrafında fikir mübadiləsi aparması gözlənilir.

Görüşdə iştirak etmək üçün Türkmənistanın xarici işlər naziri Rəşid Meredov da Azərbaycanda səfərdədir.

Qeyd edək ki, Türkiyə, Azərbaycan və Türkmənistan xarici işlər nazirləri üçtərəfli formatda dialoq mexanizminin qurulmasına ötən ilin dekabrında qərar veriblər.

Bu barədə XİN rəhbərləri Kiyevdə ATƏT Nazirlər Şurasının iclası çərçivəsində görüşdə razılığa gəliblər.