Xəbərlər

Yanvar-aprel ayları ərzində neft məhsullarının istehsalı müəssisələri tərəfindən 778 mln. manat həcmində məhsul istehsal olunub.

ERtv-nin Dövlət Statistika Komitəsinə istinadən verdiyi xəbərə görə, bu da əvvəlki ilin eyni dövrü ilə müqayisədə məhsul istehsalının 13,3 faiz azaldığını göstərir.

Statistikaya əsasən bu müddətdə 400,4 min ton avtomobil benzini, 205,8 min ton ağ neft, 695,4 min ton dizel yanacağı istehsal olunub. Və müvafiq olaraq bu məhsulların istehsalında 12 faiz, 11,6 faiz və 17,4 faiz azalma müşahidə edilib.

Qeyd edək ki, ümumiyyətlə, fiziki şəxs kimi fəaliyyət göstərənlərin istehsal etdikləri məhsulların dəyəri də nəzərə alınmaqla dörd ay ərzində 11,0 milyard manatlıq, yaxud keçən ilin müvafiq dövründə olduğundan 2,0 faiz az sənaye məhsulu istehsal edilib.

Sənaye məhsulunun 72,5 faizi mədənçıxarma bölməsində, 20,8 faizi emal bölməsində, 6,1 faizi elektrik enerjisi, qaz, buxar istehsalı, bölüşdürülməsi və təchizatı bölməsində, 0,6 faizi su təchizatı, tullantıların təmizlənməsi və emalı bölməsində istehsal olunub.

Sənayenin qeyri-neft sektorunda məhsul istehsalı 4,3 faiz artmış, neft-qaz sektorunda isə 2,9 faiz azalıb.

Mədənçıxarma bölməsində ötən ilin yanvar-aprel ayları ilə müqayisədə məhsul istehsalı 2,2 faiz azalıb. Dörd ay ərzində 14,1 milyon ton neft, 6,1 milyard kub metr əmtəəlik qaz hasil olunub.