Xəbərlər

“Azərbaycanda siyasi məhbus yoxdur, konkret cinayət əməlinə görə məsuliyyətə cəlb olunmuş şəxslər var. Vəssalam!”

ERtv xəbər verir ki, bunu Milli Məclis sədrinin birinci müavini Ziyafət Əsgərov parlamentin plenar iclasında deyib.

O, deputat İqbal Ağazadənin çıxışına münasibət bildirib.

İ.Ağazadə Milli Məclisdə “Nida” gənclər təşkilatının bir neçə üzvünün məhkəməsində dövlət ittihamçısının onlara tələb etdiyi cəzaya etiraz edib.

Daha sonra çıxış edən millət vəkili Siyavuş Novruzov isə sualların  həmin uşaqları öyrədib əlinə molotov kokteyli, eləcə də daş-dəmir parçası verib, polisin üzərinə göndərən adamlara ünvanlanmalı olduğunu deyib.  

“Suallarınızı öz övladlarını qoruyub, başqasının övladının beynini doldurub qızışdıraraq qanun pozuntularına yönəldənlərdən soruşun. 

Sual verin ki, niyə xalqın övladlarını bədbəxt edirsiniz, niyə onları məktəblərə universitetlərə, kitabxanalara, ağac əkməyə yox, məhz polisin üzərinə, ixtişaş törətməyə, həmçinin əhalinin mülkiyyətinə ziyan vurmağa yönəldirsiniz?

Hər dəfə səsləndiririk ki, Azərbaycanda siyasi məhkəmə termini yoxdur. Bütün məhkəmə işləri cinayət faktı üzərində aparılır. Məhkəmənin hökmü bitməmiş indidən məhkəmənin qərarına kölgə salmaq olmaz”, - S.Novruzov deyib.